சாலைப் பாதுகாப்பு விதிகளை பொதுமக்கள் கட்டாயம் பின்பற்ற வேண்டும் என்று விழிப்புணர்வு ஏற்படுத்தும் காவல்துறையினரே, போக்குவரத்து விதிகளை மீறியதாகக் கூறப்படும் வீடியோ ஒன்று சமூக வலைதளங்களில் வைரலாகி பரபரப்பை ஏற்படுத்தியுள்ளது.
வைரலாகும் அந்த வீடியோவில், ஒரே மோட்டார் சைக்கிளில் நான்கு காவலர்கள் பயணிப்பது தெரிகிறது. இதில், வாகனத்தை ஓட்டிய காவலர் மட்டுமே தலைக்கவசம் அணிந்திருந்த நிலையில், பின்னால் அமர்ந்திருந்த மூவரும் ஹெல்மெட் இல்லாமல் பயணித்ததாகக் கூறப்படுகிறது.
பொதுமக்கள் ஹெல்மெட் அணியாமலோ அல்லது இருசக்கர வாகனத்தில் அனுமதிக்கப்பட்ட எண்ணிக்கையை மீறி பயணித்தாலோ அபராதம் விதிக்கப்படும் நிலையில், காவல்துறையினரே விதிமீறலில் ஈடுபட்டதாகக் கூறப்படும் இந்தச் சம்பவம் குறித்து சமூக வலைதளங்களில் பலரும் கேள்வி எழுப்பி வருகின்றனர்.
இந்த வீடியோ பரவலாகப் பகிரப்பட்டு வரும் நிலையில், சம்பவம் தொடர்பாக உரிய விசாரணை நடத்தி, விதிமீறல் உறுதி செய்யப்பட்டால் சம்பந்தப்பட்ட காவலர்கள் மீது துறை ரீதியான நடவடிக்கை எடுக்க வேண்டும் என்ற கோரிக்கையும் வலுத்து வருகிறது. அதேசமயம், இந்த வீடியோ எப்போது, எங்கு பதிவு செய்யப்பட்டது மற்றும் அதிகாரப்பூர்வமாக சம்பவம் உறுதி செய்யப்பட்டதா என்பது குறித்து இதுவரை தெளிவான தகவல் வெளியாகவில்லை.
