திருமணமான பல பெண்களுக்கு எழும் பொதுவான சந்தேகம், “ஒரு முறை உடலுறவு கொண்டாலே கருத்தரிப்பு ஏற்படுமா?” என்பதாகும். இதற்கான பதில், ஆம், ஒரே ஒரு முறை உடலுறவு கொண்டாலும் கருத்தரிக்கும் வாய்ப்பு உள்ளது என்பதாகும்.
கருத்தரிப்பு என்பது ஆணின் விந்தணுவும், பெண்ணின் கருமுட்டையும் சந்திக்கும் போது நிகழ்கிறது. பெண்ணின் மாதவிடாய் சுழற்சியில் குறிப்பிட்ட காலத்தில் கருமுட்டை வெளியேறும் நிகழ்வு ‘ஓவுலேஷன்’ (Ovulation) எனப்படுகிறது. இந்த நேரத்தில் உடலுறவு ஏற்பட்டால் கருத்தரிப்பதற்கான வாய்ப்பு அதிகமாக இருக்கும்.
பொதுவாக 28 நாட்கள் மாதவிடாய் சுழற்சி கொண்ட பெண்களில், மாதவிடாய் தொடங்கிய முதல் நாளில் இருந்து சுமார் 14-வது நாளில் கருமுட்டை வெளியேறும். இந்த காலகட்டத்தில் கருப்பை கருவை ஏற்றுக்கொள்ளும் வகையில் தயாராக இருக்கும்.
உடலுறவின் போது ஆணிடமிருந்து வெளியேறும் விந்தில் கோடிக்கணக்கான விந்தணுக்கள் இருக்கும். அவற்றில் பல விந்தணுக்கள் பெண்ணின் இனப்பெருக்க பாதையில் பயணிக்கும் போது அழிந்தாலும், சில விந்தணுக்கள் கருமுட்டையை அடைகின்றன. அவற்றில் ஒரு விந்தணு மட்டுமே கருமுட்டையை இணைந்து கருத்தரிப்பை ஏற்படுத்துகிறது.
எனவே, கருத்தரிக்க பலமுறை உடலுறவு கொள்ள வேண்டும் என்பது அவசியமில்லை. கருமுட்டை வெளியேறும் சரியான காலத்தில் ஒருமுறை உடலுறவு ஏற்பட்டாலும் கர்ப்பம் தரிக்க வாய்ப்பு உள்ளது.
கருத்தரிக்கும் வாய்ப்பு அதிகம் உள்ள நாட்கள்
28 நாட்கள் மாதவிடாய் சுழற்சி உள்ள பெண்களுக்கு, பொதுவாக மாதவிடாய் தொடங்கிய முதல் நாளை கணக்கில் கொண்டு 9-ம் நாள் முதல் 18-ம் நாள் வரை கருத்தரிக்கும் வாய்ப்பு அதிகமாக இருக்கும் என மருத்துவ ரீதியாகக் கருதப்படுகிறது.
ஆனால், அனைத்து பெண்களுக்கும் மாதவிடாய் சுழற்சி ஒரே மாதிரியாக இருப்பதில்லை. சிலருக்கு சுழற்சி குறைவாகவோ அல்லது அதிகமாகவோ இருக்கலாம். அதனால், நாட்களை மட்டும் வைத்து கருத்தரிப்பைத் தவிர்ப்பது எப்போதும் நம்பகமான முறையாக இருக்காது.
கர்ப்பத்தைத் திட்டமிட விரும்புபவர்கள் அல்லது தவிர்க்க விரும்புபவர்கள், மாதவிடாய் சுழற்சியின் தன்மை, உடல்நிலை மற்றும் தேவைக்கேற்ப மருத்துவரின் ஆலோசனையைப் பெறுவது சிறந்தது.
