தற்போதைய வேகமான வாழ்க்கை முறையில் பலரும் அடிக்கடி உடல் சோர்வு, மன அழுத்தம் மற்றும் தூக்கமின்மை போன்ற பிரச்சனைகளை சந்தித்து வருகின்றனர். பரபரப்பான வேலை, அதிகமான பணிச்சுமை, சீரற்ற உணவுப் பழக்கம் உள்ளிட்ட காரணங்களால் ஏற்படும் சோர்வு பொதுவாக ஓய்வு எடுத்த பிறகு குறைந்துவிடும்.
ஆனால், போதுமான ஓய்வு எடுத்த பிறகும் தொடர்ந்து உடல் சோர்வு நீங்காமல் இருந்தால், அதை சாதாரணமாக எடுத்துக்கொள்ளக் கூடாது. இது உடலில் மறைந்திருக்கும் சில தீவிரமான உடல்நல பிரச்சனைகளின் ஆரம்ப அறிகுறியாக இருக்கலாம். குறிப்பாக, கல்லீரலை பாதிக்கும் ஹெபடைடிஸ் (Hepatitis) நோயின் அறிகுறியாகவும் இருக்க வாய்ப்புள்ளது.
ஹெபடைடிஸ் என்றால் என்ன?
ஹெபடைடிஸ் என்பது கல்லீரலில் ஏற்படும் அழற்சி ஆகும். உடலின் மிக முக்கியமான உறுப்புகளில் ஒன்றான கல்லீரல், செரிமானம், நச்சுப் பொருட்களை அகற்றுதல், உடலின் வளர்சிதை மாற்ற செயல்பாடுகள் உள்ளிட்ட பல பணிகளை மேற்கொள்கிறது.
இந்த நோய் ஆரம்ப நிலையில் பல நேரங்களில் வெளிப்படையான அறிகுறிகளை காட்டாமல் அமைதியாக கல்லீரலை பாதிக்கத் தொடங்கும். இதனால் பலருக்கு நோய் இருப்பதே தெரியாமல் போகலாம். நோய் தீவிரமடைந்த பிறகே பல்வேறு அறிகுறிகள் வெளிப்படத் தொடங்கும்.
ஹெபடைடிஸ் குறித்த விழிப்புணர்வை ஏற்படுத்தும் நோக்கில் ஒவ்வொரு ஆண்டும் ஜூலை 28-ம் தேதி உலக ஹெபடைடிஸ் தினம் அனுசரிக்கப்படுகிறது. நோயை ஆரம்ப நிலையிலேயே கண்டறிதல், தடுப்பூசி, பரிசோதனை மற்றும் சரியான சிகிச்சையின் முக்கியத்துவத்தை மக்களிடம் கொண்டு சேர்ப்பதே இதன் நோக்கமாகும்.
ஹெபடைடிஸின் ஆரம்ப எச்சரிக்கை அறிகுறிகள்
தொடர்ச்சியான உடல் சோர்வு
போதுமான தூக்கம் மற்றும் ஓய்வுக்குப் பிறகும் காரணமின்றி தொடர்ந்து சோர்வாக உணர்வது கல்லீரல் அழற்சியின் முக்கிய அறிகுறிகளில் ஒன்றாக இருக்கலாம்.
பசியின்மை
திடீரென உணவு சாப்பிடும் ஆர்வம் குறைவது, கல்லீரலின் செயல்பாடு பாதிக்கப்படுவதால் ஏற்படக்கூடும்.
குமட்டல் மற்றும் வாந்தி
உணவு எடுத்த பிறகு அடிக்கடி குமட்டல் அல்லது வாந்தி ஏற்படுவது கல்லீரல் பிரச்சனையின் அறிகுறியாக இருக்கலாம்.
அடர் நிற சிறுநீர்
போதுமான அளவு தண்ணீர் குடித்தும் சிறுநீர் அடர் நிறத்தில் இருந்தால் அல்லது கண்கள் மற்றும் தோல் மஞ்சள் நிறமாக மாறினால் உடனடியாக மருத்துவரை அணுகுவது அவசியம்.
வலது மேல் வயிற்றுப் பகுதியில் வலி
வலது விலா எலும்புக்கு கீழ் பகுதியில் தொடர்ந்து வலி அல்லது அசௌகரியம் இருந்தால், அது கல்லீரல் பாதிப்பை சுட்டிக்காட்டலாம்.
சரும அரிப்பு
குறிப்பாக இரவு நேரங்களில் காரணமின்றி அதிகமாக சரும அரிப்பு ஏற்பட்டால், அது கல்லீரல் செயல்பாட்டில் ஏற்பட்ட மாற்றத்தின் அறிகுறியாக இருக்கலாம்.
காய்ச்சல் மற்றும் உடல் வலி
லேசான காய்ச்சல், தலைவலி, தசை வலி மற்றும் உடல் சோர்வு போன்றவை சில வகையான வைரஸ் ஹெபடைடிஸின் ஆரம்ப அறிகுறிகளாக இருக்கலாம்.
எளிதில் ரத்தக்கசிவு அல்லது காயம் ஏற்படுதல்
அடிக்கடி சிராய்ப்பு ஏற்படுதல், ஈறுகளில் ரத்தக்கசிவு போன்றவை கல்லீரல் தேவையான அளவு ரத்தம் உறைவதற்கான புரதங்களை உற்பத்தி செய்ய முடியாத நிலையை குறிக்கலாம்.
யாருக்கு ஹெபடைடிஸ் ஏற்படும் அபாயம் அதிகம்?
கீழ்க்கண்டவர்களுக்கு ஹெபடைடிஸ் பாதிப்பு ஏற்படும் வாய்ப்பு அதிகமாக இருக்கலாம்:
- பாதுகாப்பற்ற பாலியல் தொடர்பில் ஈடுபடுபவர்கள்.
- அதிக அளவில் மது அருந்துபவர்கள்.
- உடல் பருமன் அல்லது கொழுப்பு கல்லீரல் (Fatty Liver) பிரச்சனை உள்ளவர்கள்.
- ஊசி அல்லது சிரிஞ்சுகளை மற்றவர்களுடன் பகிர்ந்து பயன்படுத்துபவர்கள்.
- சுகாதார வசதிகள் குறைவாக உள்ள பகுதிகளுக்கு அடிக்கடி பயணம் செய்பவர்கள்.
- ஹெபடைடிஸ் தொற்று உள்ளவர்களின் ரத்தம் அல்லது உடல் திரவங்களுடன் பாதுகாப்பற்ற முறையில் தொடர்பு கொள்பவர்கள்.
எப்போது மருத்துவரை அணுக வேண்டும்?
தொடர்ச்சியான சோர்வு, பசியின்மை, கண்கள் மஞ்சள் நிறமாகுதல், அடர் நிற சிறுநீர், வயிற்று வலி போன்ற அறிகுறிகள் தொடர்ந்து இருந்தால் தாமதிக்காமல் மருத்துவ பரிசோதனை மேற்கொள்ள வேண்டும்.
ஹெபடைடிஸை ஆரம்ப நிலையிலேயே கண்டறிந்து சரியான சிகிச்சை பெறுவதன் மூலம் கல்லீரல் பாதிப்பை கட்டுப்படுத்த முடியும். உடலின் முக்கிய உறுப்பான கல்லீரலின் ஆரோக்கியத்தை பாதுகாக்க, ஆரோக்கியமான உணவு பழக்கம், மதுவை தவிர்த்தல் மற்றும் தேவையான மருத்துவ பரிசோதனைகளை மேற்கொள்வது மிகவும் முக்கியம்.
