வேப்பூர் கூட்டு ரோடு அருகே உள்ள காட்டுமயிலூர் சந்திப்பில் பேருந்து மோதி இருசக்கர வாகன ஓட்டி உயிரிழந்த சம்பவம் பெரும் சோகத்தை ஏற்படுத்தியுள்ளது.
உள்ளூர் மக்களின் கூற்றுப்படி, இந்தச் சந்திப்பு நீண்ட காலமாக விபத்துகள் அதிகம் நடைபெறும் ஆபத்தான பகுதியாக இருந்து வருகிறது. குறிப்பாக, சேலம் நோக்கில் இருந்து வரும் வாகனங்கள் வேகக் கட்டுப்பாடின்றி இந்தச் சந்திப்பைக் கடப்பதால் அடிக்கடி விபத்துகள் ஏற்படுவதாக கூறப்படுகிறது.
அருகில் உள்ள கண்டப்பன்குறிச்சி–நல்லூர் சந்திப்பில் பாதுகாப்புத் தடுப்புகள் மற்றும் வேகக் கட்டுப்பாட்டு வசதிகள் அமைக்கப்பட்டுள்ள நிலையில், அதிக ஆபத்து நிறைந்ததாகக் கருதப்படும் காட்டுமயிலூர் சந்திப்பிலும் இதுபோன்ற பாதுகாப்பு ஏற்பாடுகள் செய்யப்பட வேண்டும் என பொதுமக்கள் வலியுறுத்துகின்றனர்.
இதுபோன்ற விபத்துகளைத் தடுக்க, வாகன ஓட்டிகள் சந்திப்புப் பகுதிகளில் வேகத்தைக் குறைத்து, போக்குவரத்து விதிகளை கடைப்பிடித்து மிகுந்த எச்சரிக்கையுடன் பயணிப்பது அவசியம்.
மேலும், சம்பந்தப்பட்ட நெடுஞ்சாலைத்துறை மற்றும் காவல்துறை அதிகாரிகள் இந்தச் சந்திப்பில் ஆய்வு மேற்கொண்டு, தேவையான பாதுகாப்புத் தடுப்புகள், எச்சரிக்கை பலகைகள், வேகத் தடுப்புகள் உள்ளிட்ட சாலைப் பாதுகாப்பு வசதிகளை விரைவாக அமைக்க நடவடிக்கை எடுக்க வேண்டும் என்பதே அப்பகுதி மக்களின் கோரிக்கையாக உள்ளது.
