தமிழகத்தில் முன்னாள் திமுக ஆட்சிக் காலத்தில் தொடங்கப்பட்ட “முதலமைச்சரின் காலை உணவுத் திட்டம்” தற்போது “பெருந்தலைவர் காமராஜர் காலை உணவுத் திட்டம்” என பெயர் மாற்றம் செய்யப்பட்டுள்ள விவகாரம் அரசியல் வட்டாரத்தில் பரபரப்பை ஏற்படுத்தியுள்ளது.
இந்த பெயர் மாற்ற நடவடிக்கைக்கு திமுக மூத்த தலைவரும் முன்னாள் அமைச்சருமான துரைமுருகன் கடும் எதிர்ப்பு தெரிவித்துள்ளார். இத்திட்டத்தை உருவாக்குவதில் முக்கிய பங்காற்றிய முதலமைச்சர் மு.க.ஸ்டாலினின் பெயர் மற்றும் அடையாளத்தை மாற்றுவது, தற்போதைய முதலமைச்சருக்கு அழகல்ல என அவர் விமர்சித்துள்ளார்.
மேலும், கடந்த அதிமுக ஆட்சியில் கொண்டுவரப்பட்ட “அம்மா உணவகம்” போன்ற திட்டங்களின் பெயர்களை திமுக ஆட்சிக்கு வந்தபோதும் மாற்றாமல் தொடர அனுமதித்ததாகவும், அரசியல் நாகரிகத்தை கருத்தில் கொண்டு இதுபோன்ற அணுகுமுறையை கடைப்பிடித்ததாகவும் துரைமுருகன் குறிப்பிட்டார்.
அரசியல் பாரம்பரியமும், திட்டங்களின் தொடர்ச்சியின் முக்கியத்துவமும் தெரிந்த கட்சிகளுக்கே இதன் மதிப்பு புரியும் என்றும், தற்போதைய அரசியல் சூழலில் உருவான சில கட்சிகளுக்கு அது புரியவில்லை எனவும் அவர் மறைமுகமாக விமர்சித்தார்.
மேலும், தேவையற்ற பெயர் மாற்றங்களில் கவனம் செலுத்துவதை விட, மக்களின் முக்கிய பிரச்சனைகளுக்கு தீர்வு காண்பதில் அரசு கவனம் செலுத்த வேண்டும் என்றும் துரைமுருகன் வலியுறுத்தினார்.
