தினமும் பயன்படுத்தும் சாக்ஸ்களை துவைக்காமல் மீண்டும் மீண்டும் அணிவது மற்றும் வியர்வையுடன் நீண்ட நேரம் காலணிகளை அணிந்து உடற்பயிற்சி செய்வது, Athlete’s Foot (பாதப் பூஞ்சை தொற்று) ஏற்படும் அபாயத்தை அதிகரிக்கும் என்று உலக சுகாதார அமைப்பு எச்சரித்துள்ளது.
இந்த பூஞ்சை தொற்று, ஈரப்பதம் மற்றும் வெப்பம் அதிகமாக இருக்கும் சூழலில் வேகமாக வளரக்கூடியது. முதலில் கால் விரல்களின் இடுக்குகளில் தொடங்கி, கடுமையான அரிப்பு, எரிச்சல், தோல் உரிதல், வெடிப்பு மற்றும் துர்நாற்றம் போன்ற பிரச்சினைகளை ஏற்படுத்தும். சிகிச்சை பெறாமல் விட்டால், பாதம் முழுவதும் பரவி மேலும் சிரமங்களை உண்டாக்கும் அபாயமும் உள்ளது.
இந்த பாதிப்பைத் தவிர்க்க, தினமும் சுத்தமாகத் துவைத்த பருத்தி சாக்ஸ்களை மட்டுமே பயன்படுத்த வேண்டும். உடற்பயிற்சிக்குப் பிறகு கால்களை நன்றாகக் கழுவி உலர்த்துவதுடன், ஈரமான சாக்ஸ் மற்றும் காலணிகளை நீண்ட நேரம் அணிவதைத் தவிர்க்க வேண்டும். தனிப்பட்ட சுகாதாரத்தைப் பேணுவது மற்றும் கால்களை எப்போதும் உலர்வாக வைத்திருப்பது இந்த பூஞ்சை தொற்றிலிருந்து பாதுகாக்கும் முக்கிய வழிமுறைகளாகும்.
