இன்றைய காலத்தில் விலங்குகளின் உயிருக்கும் கூட மதிப்பு அளிக்கப்படும் நிலையில், பழங்காலங்களில் சில அரசாட்சிகளில் மனித உயிர்களுக்கு எந்த அளவுக்கு மதிப்பு குறைவாக இருந்தது என்பதை வரலாற்றுச் சம்பவங்கள் வெளிப்படுத்துகின்றன.
உலகின் மிகப்பெரும் சாம்ராஜ்யங்களில் ஒன்றாகக் கருதப்பட்ட ஒட்டோமன் (ஆட்டமன்) சாம்ராஜ்யத்தை உருவாக்கியதில் துருக்கியை ஆண்ட இரண்டாம் முகம்மது சுல்தானுக்கு முக்கிய பங்கு இருந்தது. இவர் கி.பி.1451 முதல் 1481 வரை ஆட்சி செய்தார். இவரது ஆட்சிக் காலத்தில் ஒட்டோமன் பேரரசு மிகுந்த வலிமை பெற்றது.
ஒருநாள் இரண்டாம் முகம்மது சுல்தான் அரண்மனையில் உணவருந்திக் கொண்டிருந்தார். அப்போது சுவைமிக்க முலாம் பழம் ஒன்றை சாப்பிட்டுக் கொண்டிருந்தார். திடீரென அரசுப் பணி ஒன்று வந்ததால், சாப்பிட்டு மீதமிருந்த பழத்தை அப்படியே வைத்துவிட்டு பணியை கவனிக்கச் சென்றார்.
சுமார் 10 நிமிடங்களுக்குப் பிறகு திரும்பி வந்து பார்த்தபோது, அவர் வைத்துச் சென்ற முலாம் பழத்தைக் காணவில்லை. இதனால் கோபமடைந்த மன்னர், அந்த அறையில் பணியாற்றிக் கொண்டிருந்த 14 பணியாளர்களையும் அழைத்து விசாரித்தார்.
“நான் மீதம் வைத்திருந்த முலாம் பழம் எங்கே?” என்று கடும் கோபத்துடன் கேட்டார். ஆனால், பணியாளர்கள் யாரும் தங்களுக்கு எதுவும் தெரியாது என்று கூறினர். இதனால் மன்னரின் கோபம் மேலும் அதிகரித்தது.
பின்னர் அரண்மனை வைத்தியரை அழைத்த மன்னர், “இந்த 14 பேரில் யாரோ ஒருவர் அந்தப் பழத்தைத் திருடி சாப்பிட்டிருக்கிறார். அதை கண்டுபிடிக்க வேண்டும்” என்று உத்தரவிட்டார். அதற்காக அவர்களின் வயிற்றை அறுத்து சோதனை செய்யும்படி கொடூரமான ஆணையிட்டதாக வரலாற்றுக் குறிப்புகள் கூறுகின்றன.
மன்னரின் உத்தரவின்படி, அந்த 14 பணியாளர்களின் வயிறுகளும் அறுக்கப்பட்டன. ஆனால், சோதனை செய்தபோது யாருடைய வயிற்றிலும் முலாம் பழத்தின் சிறு துண்டு கூட கிடைக்கவில்லை. உயிருடன் இருந்த அந்த அப்பாவி பணியாளர்கள் சிறிது நேரத்தில் உயிரிழந்தனர்.
இந்த கொடூர சம்பவம் நடந்துகொண்டிருக்கும்போது, மன்னர் புதிதாக கொண்டுவரப்பட்ட மற்றொரு முலாம் பழத்தை சாப்பிட்டுக் கொண்டிருந்ததாக கூறப்படுகிறது. இறுதியில் யாரும் பழத்தை சாப்பிடவில்லை என்பதை அறிந்த அவர், “இவர்கள் சாப்பிடவில்லை போல” என்று கூறிவிட்டு அங்கிருந்து சென்றதாக சொல்லப்படுகிறது.
ஒரு பழத்திற்காக 14 மனித உயிர்கள் பறிபோனதாக கூறப்படும் இந்த நிகழ்வு, பழங்கால அரசர்களின் எல்லையற்ற அதிகாரமும், சில காலகட்டங்களில் மனித உயிர்களுக்கு வழங்கப்பட்ட குறைந்த மதிப்பையும் எடுத்துக்காட்டுகிறது.
இந்த சம்பவம் பல்வேறு வரலாற்று கதைகள் மற்றும் இணையப் பதிவுகளில் பரவலாக சொல்லப்பட்டு வரும் ஒரு நிகழ்வாகும். இதன் முழுமையான வரலாற்று ஆதாரங்கள் குறித்து வரலாற்றாளர்களிடையே வேறுபட்ட கருத்துகள் உள்ளன.
