நாடாளுமன்ற மழைக்கால கூட்டத்தொடர் நடைபெற்று வரும் நிலையில், டெல்லியில் மாணவர்கள் போராட்டத்தின் போது காவல்துறை மேற்கொண்ட நடவடிக்கை குறித்து மத்திய அரசை கடுமையாக விமர்சித்த மக்களவை எதிர்க்கட்சித் தலைவர் ராகுல் காந்தி, பிரதமர் நரேந்திர மோடி மன்னிப்பு கேட்க வேண்டும் என்றும், மத்திய உள்துறை அமைச்சர் அமித்ஷா மற்றும் கல்வி அமைச்சர் தர்மேந்திர பிரதான் ஆகியோர் பதவி விலக வேண்டும் என்றும் வலியுறுத்தினார்.
நாடாளுமன்ற வளாகத்தில் செய்தியாளர்களை சந்தித்த ராகுல் காந்தி, மாணவர்கள் மீதான காவல்துறை நடவடிக்கைக்கு மத்திய அரசே முழுப் பொறுப்பேற்க வேண்டும் என்றார். மேலும், மாணவர்களின் பிரச்சினைகள் குறித்து நாடாளுமன்றத்தில் விவாதிக்க வேண்டும் என எதிர்க்கட்சிகள் விரும்புவதாகவும், இதுதொடர்பாக மக்களவை சபாநாயகர் ஓம் பிர்லாவிடம் கோரிக்கை விடுத்துள்ளதாகவும் தெரிவித்தார்.
தொடர்ந்து பேசிய அவர், நாட்டின் கல்வி மற்றும் தேர்வு முறை தொடர்பாக பல்வேறு கேள்விகள் எழுந்துள்ள நிலையில், அவற்றுக்கு எதிராக போராடும் மாணவர்கள் மீது வன்முறையைப் பயன்படுத்தியது ஏற்க முடியாதது என்று விமர்சித்தார். இந்த விவகாரம் குறித்து பிரதமர் மோடி தனது நிலைப்பாட்டை விளக்க வேண்டும் என்றும் அவர் வலியுறுத்தினார்.
மேலும், கல்வி அமைச்சர் தர்மேந்திர பிரதானின் ராஜினாமாவை வலியுறுத்தி நடைபெற்ற போராட்டத்தில் மாணவர்கள் மீது நடவடிக்கை எடுத்தது மத்திய உள்துறை அமைச்சகத்தின் கட்டுப்பாட்டில் செயல்படும் டெல்லி காவல்துறையென குறிப்பிட்ட ராகுல் காந்தி, இதற்கு அரசியல் பொறுப்பேற்று அமித்ஷா மற்றும் தர்மேந்திர பிரதான் ஆகியோர் பதவி விலக வேண்டும் என்றார்.
ராகுல் காந்தியின் இந்தக் கருத்துகள் தேசிய அரசியல் வட்டாரத்தில் பரபரப்பை ஏற்படுத்தியுள்ளன. அதே நேரத்தில், இந்த விவகாரம் குறித்து மத்திய அரசின் அதிகாரப்பூர்வ பதில் வெளியாகும் என எதிர்பார்க்கப்படுகிறது.
