அன்பு மகனுக்கு அம்மாவின் கடிதம்

வசதியாகத்தான் இருக்கிறது மகனே

கொண்டு வந்து சேர்ந்த முதியோர் இல்லம்

பொறுப்பாய் ஒப்படைத்து விட்டு

வெளியேறிய போது

முன்பு நானும் இது போல்

உன்னை வகுப்பறையில் விட்டு விட்டு

என் முதுகுக்குப் பின்னால்

நீ கதறக் கதறக்

நான் கண்ணீரை மறைத்தபடி

புறப்பட்ட காட்சி ஞாபகத்தில் எழுகிறது

முதல் தரமிக்க இந்த இல்லத்தை

தேடித் திரிந்து

நீ தேர்ந்தெடுத்ததை அறிகையில்

அன்று உனக்காக நானும்

பொருத்தமான பள்ளி எதுவென்றே

ஓடி அலைந்ததை ஒப்பீடு செய்கிறேன்

இது வரையில் ஒரு முறையேனும்

என் முகம் பார்க்க நீ வராமல் போனாலும்

என் பராமரிப்பிற்கான மாதத் தொகையை

நீ மறக்காமல் அனுப்பி

வைப்பதற்கு மகிழ்ச்சியடைகிறேன்

நீ விடுதியில் தங்கிப் படித்த காலத்தில்

உன்னைப் பார்க்க வேண்டும் என்ற

ஆவல் இருந்தாலும்

படிப்பை நினைந்து

உன்னை சந்திக்க மறுத்தேன்

எதிர் வினையே இது

இப்போது அறிகிறேன்

இளம் வயதினில் நீ சிறுகச் சிறுக

சேமித்த அனுபவத்தை

என் முதுமைப்பருவத்தில்

மொத்தமாக எனக்கே செலவு செய்கிறாய்

ஆயினும்

உனக்கும் எனக்கும்

ஒரு சிறு வேறு பாடு தான்

நான் கற்றுக் கொடுத்தேன்

உனக்கு வாழ்ககை இது தான் என

நீ கற்றுக் கொடுக்கிறாய் எனக்கு

உறவுகள் இதுதானென்று

தாய் தந்தை மீது பாசம் வையுங்கள்

ஒவ்வொருவருக்குமான பதிவு இது.