விடுமுறை நாட்களில் சப்பாத்தி, பூரி, பரோட்டா அல்லது இடியாப்பம் செய்து சாப்பிடுவது பலரின் விருப்பமாக இருக்கும். ஆனால் அதற்கு எப்போதும் ஒரே மாதிரியான கிரேவி செய்து அலுத்துவிட்டால், இந்த முறை ஹோட்டல் சுவையில் அசத்தும் பரோட்டா கடை ஸ்டைல் சிக்கன் சால்னா செய்து பாருங்கள். இந்த சால்னா பரோட்டாவுடன் மட்டுமல்லாமல், சப்பாத்தி, தோசை, பூரி மற்றும் இடியாப்பத்துடனும் சிறப்பாகப் பொருந்தும்.
தேவையான பொருட்கள்
மசாலா அரைக்க
- கடலை எண்ணெய் – 2 டீஸ்பூன்
- கசகசா – 1 டீஸ்பூன்
- துருவிய தேங்காய் – 1 கப்
- மல்லித்தூள் – 2½ டேபிள் ஸ்பூன்
- சிக்கன் மசாலா – 2½ டேபிள் ஸ்பூன்
- பொட்டுக்கடலை – 1 டேபிள் ஸ்பூன்
சால்னா தயாரிக்க
- கடலை எண்ணெய் – 2 டேபிள் ஸ்பூன்
- பட்டை – 1 துண்டு
- கிராம்பு – 3
- அன்னாசிப்பூ – 1
- ஏலக்காய் – 2
- சோம்பு – 1 டீஸ்பூன்
- கறிவேப்பிலை – 1 கொத்து
- பெரிய வெங்காயம் – 2 (நறுக்கியது)
- இஞ்சி-பூண்டு விழுது – 1 டேபிள் ஸ்பூன்
- மஞ்சள்தூள் – ½ டீஸ்பூன்
- மிளகாய்த்தூள் – 2 டீஸ்பூன்
- பெரிய தக்காளி – 2 (நறுக்கியது)
- சிக்கன் – ½ கிலோ
- உப்பு – தேவையான அளவு
- தண்ணீர் – தேவையான அளவு
- புதினா – சிறிதளவு
- கொத்தமல்லித்தழை – சிறிதளவு
செய்முறை
முதலில் ஒரு வாணலியில் கடலை எண்ணெய் ஊற்றி கசகசா மற்றும் துருவிய தேங்காயை லேசாக வதக்கவும். பின்னர் மல்லித்தூள், சிக்கன் மசாலா சேர்த்து மிதமான தீயில் வறுத்து, இறுதியாக பொட்டுக்கடலையைச் சேர்த்து ஒரு நிமிடம் கிளறி இறக்கவும். ஆறிய பிறகு சிறிதளவு தண்ணீர் சேர்த்து நன்றாக மைய அரைத்துக் கொள்ளவும்.
அடுத்து ஒரு குக்கரில் எண்ணெய் ஊற்றி பட்டை, கிராம்பு, அன்னாசிப்பூ, ஏலக்காய், சோம்பு மற்றும் கறிவேப்பிலையைத் தாளிக்கவும். பின்னர் வெங்காயத்தை சேர்த்து பொன்னிறமாகும் வரை வதக்கி, இஞ்சி-பூண்டு விழுதைச் சேர்த்து பச்சை வாசனை போகும் வரை கிளறவும்.
அதன்பின் மஞ்சள்தூள், மிளகாய்த்தூள் சேர்த்து கிளறி, தக்காளி மற்றும் உப்பைச் சேர்த்து நன்றாகக் குழைய வதக்கவும். பிறகு சிக்கனைச் சேர்த்து 3 முதல் 4 நிமிடங்கள் வரை மசாலா நன்றாக ஒட்டும் வரை கிளறவும்.
இப்போது அரைத்த மசாலாவைச் சேர்த்து, தேவையான அளவு தண்ணீர் ஊற்றி நன்றாகக் கலக்கவும். புதினா மற்றும் கொத்தமல்லித்தழை சேர்த்து குக்கரை மூடி, மிதமான தீயில் ஒரு விசில் வரும் வரை வேகவிடவும்.
விசில் அடங்கிய பிறகு திறந்து, மேலும் சிறிதளவு புதினா மற்றும் கொத்தமல்லித்தழை தூவி கிளறினால், மணமும் சுவையும் நிறைந்த பரோட்டா கடை ஸ்டைல் சிக்கன் சால்னா தயார்.
சுவை குறிப்பு
- சால்னா சற்று தண்ணீராக இருந்தால்தான் பரோட்டாவுடன் ஹோட்டல் சுவை கிடைக்கும்.
- தேங்காய் மற்றும் கசகசா சேர்ப்பதே இந்த சால்னாவின் க்ரீமியான சுவைக்கு முக்கிய காரணம்.
- பரோட்டா மட்டுமின்றி சப்பாத்தி, தோசை, இடியாப்பம், ஆப்பம் ஆகியவற்றுடனும் இந்த சால்னா அருமையாக இருக்கும்.
