கண்களுக்குக் கீழே தோன்றும் கருவளையம், முகத்தின் இயற்கையான பொலிவை குறைக்கும் பொதுவான அழகு சார்ந்த பிரச்சனையாக உள்ளது. தூக்கமின்மை, சத்துக்குறைவு, தோலில் ஏற்படும் மாற்றங்கள் உள்ளிட்ட பல காரணங்களால் இது உருவாகலாம். ஆரம்பத்திலேயே கவனம் செலுத்தினால் இதை கட்டுப்படுத்த முடியும்.
கண்களைச் சுற்றியுள்ள தோல் மிகவும் மெல்லியதாக இருப்பதால், வெயிலில் அதிக நேரம் இருப்பது, கண்களை அடிக்கடி தேய்ப்பது, போதிய தூக்கம் இல்லாமை, அதிக மன அழுத்தம் போன்ற காரணங்களால் கருவளையம் ஏற்படுகிறது. தோலில் அதிக அளவில் நிறமி (Pigmentation) சேர்வதும் இதற்கு முக்கிய காரணமாகும்.
கருவளையம் பொதுவாக கண்களுக்கு ஆபத்தை ஏற்படுத்தாது. இது பெரும்பாலும் அழகு தொடர்பான பிரச்சனையாகவே கருதப்படுகிறது. இருப்பினும், சில சமயங்களில் வைட்டமின் குறைபாடு, நீண்டகால உடல்நலப் பிரச்சனைகள், கடுமையான காய்ச்சல் உள்ளிட்ட காரணங்களாலும் கண்களைச் சுற்றி கருமை தோன்றலாம்.
கருவளையத்தைத் தடுக்கும் வழிகள்:
- தினமும் போதுமான அளவு தூக்கம் பெற வேண்டும்.
- வைட்டமின் ஏ, ஈ உள்ளிட்ட சத்துக்கள் நிறைந்த உணவுகளை உட்கொள்ள வேண்டும்.
- கண்களுக்கு அதிக நேரம் அழுத்தம் கொடுக்காமல், இடைவெளி எடுத்துக் கொள்ள வேண்டும்.
- கணினி மற்றும் மொபைல் பயன்படுத்தும் போது கண்களுக்கு ஓய்வு அளிக்க வேண்டும்.
- அதிக மன உளைச்சலைத் தவிர்த்து, மனதை அமைதியாக வைத்துக் கொள்ள வேண்டும்.
- வெயிலில் செல்லும் போது கண்களைப் பாதுகாக்க வேண்டும்.
கருவளையம் ஏற்பட்டுவிட்டால் கவலைப்பட தேவையில்லை. அதிகமான மன அழுத்தமும் பிரச்சனையை மேலும் அதிகரிக்கலாம். உருளைக்கிழங்கு, வெள்ளரிக்காய், புதினா, கற்றாழை போன்ற இயற்கை பொருட்களை சரியான முறையில் பயன்படுத்துவது சிலருக்கு உதவியாக இருக்கலாம்.
இருப்பினும், நீண்ட நாட்களாக கருவளையம் நீங்காமல் இருந்தால், தோல் மருத்துவரின் ஆலோசனையைப் பெற்று தேவையான சிகிச்சை அல்லது முகப்பூச்சுகளை பயன்படுத்துவது சிறந்தது.
