குதிரையை விட வேகமாக ஓடக்கூடிய விலங்கு சிறுத்தை ஏன் சிறுத்தை திறன் என்று சொல்லாமல் குதிரை திறன் (Horsepower; hp) என்று சொல்கிறார்கள்?
இதன் விளக்கம்
சிறுத்தை மணிக்கு 60 மைல் வேகத்தில் ஓடும் திறன் உள்ளது என்பதில் ஐயமில்லை. ஆனால் அவை எல்லா நேரங்களிலும் அவ்வளவு வேகமாக தொடர்ந்து ஓடுவதில்லை. வேட்டையை துரத்தும் போது மட்டும் சுமார் 30 வினாடிகள் வேகமாக ஓடி இரையை பிடிக்கும். பல நேரங்களில் கோட்டை விடவும் வாய்ப்பு உள்ளது. ஏனெனில் சிறுத்தை எளிதில் களைத்தும் போகும். அது ஒரு பக்கம் இருக்கட்டும். சிறுத்தை பளுவை இழுக்கும் விலங்கு கிடையாது. எனவே அதன் ஓடும் திறனை மட்டும் வைத்து கணக்கிடுவது தவறு.
குதிரைத்திறன் அலகு என்பது ஜேம்ஸ் வாட் வடிவமைத்த சந்தைப்படுத்தல் யுக்தியிலிருந்து பெறப்பட்டது.
1770 களில் ஜேம்ஸ் வாட் நீராவி இயந்திரத்தை கண்டுபிடித்த போது, நெடுந்தூர பயணங்களுக்கு மக்கள் குதிரையை பயன்படுத்திய காலம். அப்போது அவர் புதிதாகக் கண்டுபிடித்த நீராவி இயந்திரத்தை விற்க முயற்சித்தபோது, அவரது வாடிக்கையாளர்களில் பலர் குதிரைகளை பயன்படுத்தவே பழக்கப்பட்டவர்கள். அவர்கள் இயந்திர சக்தி எவ்வளவு அதிகம் என்பதை அறியவில்லை.
இதை உணர்ந்த அவர், ஒரு குதிரையால் கொடுக்க முடியும் சக்தியை கணக்கிட்டு அதை தன் இயந்திரத்தின் சக்தியுடன் ஒப்பிட்டார்.
குதிரைத்திறன் என்பது முதலில் 1,000 அடி ஆழமான கிணற்றின் அடிப்பகுதியில் இருந்து காற்றில் 33,000 பவுண்டுகள் தண்ணீரை ஒரு அடி தூக்கும் அடிப்படையில் உருவாக்கப்பட்டது. இதை ஜேம்ஸ் வாட் தனது நீராவி என்ஜின்களின் செயல்திறனுக்கான சூழலை வழங்க பயன்படுத்தினார். ஒற்றை குதிரையின் சக்தியைக் கணக்கிடும் முயற்சியில், வாட் ஆலையில் பயன்படுத்தப்பட்ட குதிரைகள் வேலை செய்வதைப் பார்த்துத் தொடங்கினார்.
ஐந்து அல்லது பத்து குதிரைகள் செய்யும் வேலையை ஒரு சிறு இயந்திரம் செய்ய முடியும் என்பதை எடுத்துக்காட்டி, தன் இயந்திரத்தின் விற்பனையை பெருக்கினார் ஜேம்ஸ் வாட்.
ஜேம்ஸ் வாட்டின் நீராவி என்ஜின் விற்பனை உயர்ந்ததால், அவரது போட்டியாளர்கள் தங்கள் இயந்திரங்களின் சக்தியை “குதிரைத்திறனில்” விளம்பரப்படுத்தத் தொடங்கினர். இதனால் இந்தச் சொல் இன்றும் பயன்படுத்தப்படும் இயந்திர சக்தியின் நிலையான அளவீடாக உள்ளது.
