குழந்தைகளிடம் அதிகரித்து வரும் உடல் பருமன், எதிர்கால ஆரோக்கியத்தை பாதிக்கக்கூடிய முக்கிய பிரச்சனையாக பார்க்கப்படுகிறது. சிறு வயதிலேயே அதிக எடை நீடித்தால், பின்னர் நீரிழிவு, உயர் ரத்த அழுத்தம், இதயநோய் உள்ளிட்ட பாதிப்புகளுக்கான ஆபத்து அதிகரிக்கலாம்.
இதனைத் தவிர்க்க முதலில் உணவுப் பழக்கத்தை மாற்றுவது அவசியம். பாக்கெட் உணவுகள், துரித உணவுகள், அதிக சர்க்கரை கொண்ட பானங்கள் மற்றும் நொறுக்குத் தீனிகளை குறைத்து, காய்கறிகள், பழங்கள், பருப்புகள், நட்ஸ் மற்றும் புரதச்சத்து நிறைந்த உணவுகளை குழந்தைகளுக்கு வழங்கலாம்.
அதேபோல், தினமும் குறைந்தது ஒரு மணி நேரம் உடல் இயக்கம் இருக்கும்படி பார்த்துக்கொள்ள வேண்டும். ஓட்டப்பந்தயம், சைக்கிள், விளையாட்டு போன்றவற்றில் குழந்தைகளை ஈடுபடுத்துவது நல்லது. செல்போன் மற்றும் டிவி பயன்படுத்தும் நேரத்தையும் கட்டுப்படுத்துவது அவசியம்.
போதுமான தண்ணீர் குடிப்பதும், வயதுக்கேற்ற அளவு தூங்குவதும் முக்கியம். குறிப்பாக இரவு நேரத்தில் திரை சாதனங்களை தவிர்த்து, சரியான நேரத்தில் தூங்கும் பழக்கத்தை உருவாக்குவது குழந்தைகளின் ஒட்டுமொத்த ஆரோக்கியத்திற்கு உதவும்.
