100% எழுத்தறிவை நோக்கி தமிழ்நாடு அதிரடி முன்னேற்றம்; ஒரே நாளில் 4.45 லட்சம் பேர் தேர்வு எழுதி சாதனை!

தமிழகத்தை முழு எழுத்தறிவு பெற்ற மாநிலமாக மாற்றும் நோக்கில் மேற்கொள்ளப்பட்டு வரும் முயற்சிகள் தற்போது குறிப்பிடத்தக்க முன்னேற்றத்தை எட்டியுள்ளன. இதற்காக மாநிலம் முழுவதும் நடத்தப்பட்ட எழுத்தறிவு மற்றும் எண்ணறிவு தேர்வில் லட்சக்கணக்கானோர் ஆர்வத்துடன் பங்கேற்றுள்ளனர். தமிழகத்தின் இந்த முன்னேற்றத்தை மத்திய கல்வி அமைச்சகமும் பாராட்டியுள்ளது.
கடந்த நவம்பர் 15ஆம் தேதி தமிழகம் முழுவதும் அமைக்கப்பட்டிருந்த 23,640 தேர்வு மையங்களில் எழுத்தறிவு மற்றும் எண்ணறிவு தேர்வு நடைபெற்றது. இதில் சுமார் 4.45 லட்சம் பேர் கலந்து கொண்டு தங்களது திறமைகளை வெளிப்படுத்தினர். கல்வி கற்கும் வாய்ப்பு கிடைக்காதவர்களுக்கும் அடிப்படை எழுத்தறிவு மற்றும் எண்ணறிவை வழங்கும் நோக்கில் இந்தத் தேர்வு நடத்தப்பட்டுள்ளது.
தற்போதைய நிலவரப்படி தமிழ்நாடு 98 சதவீத எழுத்தறிவு கொண்ட மாநிலமாக இருப்பதாக தெரிவிக்கப்பட்டுள்ளது. இதன் மூலம் முழு எழுத்தறிவு என்ற இலக்கை அடைவதற்கான இறுதிக்கட்ட முன்னேற்றத்தை மாநிலம் எட்டியுள்ளது.
நவம்பர் 15ஆம் தேதி நடைபெற்ற தேர்வின் முடிவுகள் வெளியான பிறகு, தமிழகத்தின் எழுத்தறிவு நிலை மேலும் உயர்ந்து 100 சதவீதத்தை எட்டும் என எதிர்பார்க்கப்படுகிறது. இதனைத் தொடர்ந்து தமிழ்நாடு முழு எழுத்தறிவு பெற்ற மாநிலமாக அறிவிக்கப்படலாம் என்ற எதிர்பார்ப்பும் உருவாகியுள்ளது.




கருத்துகள் (0)