மகள் பிறந்த மறுநாளே ரூ.1.5 கோடி லொட்டரி பரிசு வென்ற தச்சர் – குடும்பத்திற்கு இரட்டிப்பு மகிழ்ச்சி!

பஞ்சாப் மாநிலம் மான்சா மாவட்டத்தைச் சேர்ந்த 24 வயதான தச்சர் யுத்வீர் சிங்கிற்கு வாழ்க்கையில் மறக்க முடியாத இரட்டை மகிழ்ச்சி கிடைத்துள்ளது. அவரது மனைவி பெண் குழந்தையைப் பெற்றெடுத்த மறுநாளே, அவருக்கு ரூ.1.5 கோடி மதிப்பிலான லொட்டரி முதல் பரிசு கிடைத்துள்ளது.

நவம்பர் 6ஆம் தேதி யுத்வீர் சிங்கின் மனைவி ஹர்மன் பெண் குழந்தையைப் பெற்றெடுத்தார். இதற்கு அடுத்த நாளான நவம்பர் 7ஆம் தேதி வெளியான பஞ்சாப் மாநிலத்தின் 'Dear 200' மாதாந்திர லொட்டரி முடிவுகளில், யுத்வீர் சிங் முதல் பரிசான ரூ.1.5 கோடியை வென்றிருப்பது தெரியவந்தது.

மருத்துவச் செலவுகளுக்காகவே பணம் தேவைப்பட்ட சூழலில், அவர் லொட்டரி டிக்கெட் வாங்கிய பின்னணியும் சுவாரஸ்யமானது. கர்ப்பிணியாக இருந்த தனது மனைவியை மருத்துவப் பரிசோதனைக்காக மான்சாவில் உள்ள தனியார் மருத்துவமனைக்கு அழைத்துச் சென்றபோது, வழியில் இருந்த கடையில் முதல் முறையாக லொட்டரி டிக்கெட் ஒன்றை வாங்கியுள்ளார். அப்போது குடும்பத்தின் மருத்துவச் செலவுகளுக்குப் பணம் தேவைப்பட்டதால், லொட்டரி வாங்குவதற்கு அவரது மனைவி ஆரம்பத்தில் எதிர்ப்பு தெரிவித்ததாகவும் யுத்வீர் கூறியுள்ளார்.

இதற்கிடையில், பெண் குழந்தை பிறந்தது குறித்து குடும்பத்தில் சிலர் தங்களது எதிர்பார்ப்புகளை வெளிப்படுத்தியதாகவும் அவர் தெரிவித்துள்ளார். ஆனால், தனது மகள் குடும்பத்திற்கு மிகப்பெரிய அதிர்ஷ்டத்தைக் கொண்டு வந்துள்ளதாக மகிழ்ச்சியுடன் குறிப்பிட்ட யுத்வீர், குழந்தைக்கு 'பர்கத்' என்று பெயர் சூட்டியுள்ளார். இந்தப் பெயருக்கு செழிப்பு என்று பொருள்.

2024ஆம் ஆண்டு திருமணம் செய்துகொண்ட யுத்வீர் சிங், தனது தந்தையுடன் எளிய பொருளாதாரச் சூழலில் வாழ்ந்து வந்துள்ளார். தினக்கூலி தொழிலாளியான அவரது தந்தையின் வருமானத்தை நம்பியிருந்த குடும்பம், இரண்டு அறைகள் கொண்ட வீட்டைக் கட்டுவதற்காகக் கடனும் பெற்றிருந்தது. இந்நிலையில், கிடைத்துள்ள லொட்டரி பரிசு குடும்பத்தின் கடன்களை அடைத்து பொருளாதாரச் சுமையைக் குறைக்க உதவும் என நம்பப்படுகிறது.

மேலும், பரிசுத் தொகையை தனது மகளின் கல்வி மற்றும் எதிர்காலத்திற்காகப் பயன்படுத்தவே விரும்புவதாக யுத்வீர் தெரிவித்துள்ளார். மகள் சிறந்த கல்வி பெற்று, எதிர்காலத்தில் யாருடைய உதவியையும் சாராமல் சொந்தக் காலில் நிற்க வேண்டும் என்பதே தனது விருப்பம் என்றும் அவர் கூறியுள்ளார்.

மகளின் பிறப்பால் கிடைத்த மகிழ்ச்சியுடன், எதிர்பாராத வகையில் கிடைத்த கோடிக்கணக்கான லொட்டரி பரிசும் இணைந்ததால் யுத்வீர் சிங் குடும்பத்தில் இரட்டிப்பு கொண்டாட்டம் ஏற்பட்டுள்ளது.