“கம்யூனிசத்தை யாராலும் அழிக்க முடியாது!” – எதிரிகளுக்கு சிபிஎம் மாநிலச் செயலாளர் பெ.சண்முகம் பதிலடி!

கம்யூனிஸ்டுகள் ஒழிய வேண்டும் என்று விரும்பும் எதிரிகளை அதற்குரிய முறையில் எதிர்கொள்வோம் என்றும், கம்யூனிசத்திற்கு என்றும் அழிவில்லை என்றும் மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ.சண்முகம் தெரிவித்துள்ளார்.

இதுதொடர்பாக தனது எக்ஸ் சமூக வலைதளப் பக்கத்தில் பதிவிட்டுள்ள அவர், இடைத்தேர்தல் முடிவுகள் மற்றும் கம்யூனிஸ்ட் கட்சிகள் பெற்ற வாக்குகளை முன்வைத்து சமூக வலைதளங்களில் பல்வேறு கருத்துகள் பகிரப்பட்டு வருவதாகக் குறிப்பிட்டுள்ளார்.

குறிப்பாக, கம்யூனிஸ்ட் கட்சிகள் மீதான வெறுப்பு, எதிர்ப்பு, ஒவ்வாமை போன்ற உணர்வுகளின் அடிப்படையிலும், நட்பு மற்றும் நலன் சார்ந்த நோக்கங்களுடனும் பலர் கருத்துகளையும் அறிவுரைகளையும் தெரிவித்து வருவதாகக் கூறியுள்ளார்.

இத்தகைய விமர்சனங்களுக்குப் பதிலளிக்கும் வகையில், “கம்யூனிஸ்டுகள் ஒழிய வேண்டும் என்று விரும்புகிற எங்களது எதிரிகளை அதற்குரிய முறையில் எதிர்கொள்வோம். கம்யூனிசத்திற்கு என்றும் அழிவில்லை; அதை யாராலும் அழிக்கவும் முடியாது” என உறுதிபடத் தெரிவித்துள்ளார்.

தேர்தல் முடிவுகளைத் தொடர்ந்து கம்யூனிஸ்ட் கட்சிகள் குறித்து எழுந்துள்ள விமர்சனங்களுக்கு பெ.சண்முகம் அளித்துள்ள இந்தப் பதிலடி அரசியல் வட்டாரத்தில் கவனத்தை ஈர்த்துள்ளது.