3 வயது சிறுவனைக் கட்டிவைத்து தாக்கிய சம்பவம்.. ஆசிரியை உள்ளிட்ட இருவர் பணிநீக்கம்!

திருவாரூர் மாவட்டம் திருத்துறைப்பூண்டியில் செயல்பட்டு வரும் தனியார் பள்ளி ஒன்றில், 3 வயது சிறுவனின் கைகளைக் கட்டிவைத்து தாக்கியதாக எழுந்த புகார் பரபரப்பை ஏற்படுத்தியுள்ளது. பள்ளியில் படித்து வந்த பச்சிளம் வயது சிறுவனிடம் இத்தகைய செயல் நடந்ததாகத் தகவல் வெளியானதைத் தொடர்ந்து, சம்பந்தப்பட்டவர்கள் மீது நடவடிக்கை எடுக்க வேண்டும் என்ற கோரிக்கை எழுந்தது.
இதையடுத்து, பள்ளி நிர்வாகம் இந்த விவகாரத்தில் உடனடி நடவடிக்கை மேற்கொண்டுள்ளது. சம்பவத்தில் தொடர்புடையதாகக் கூறப்படும் ஆசிரியை பாக்கியலட்சுமி மற்றும் பள்ளியில் பணியாற்றிய உதவியாளர் ஆகிய இருவரையும் நிர்வாகம் பணிநீக்கம் செய்துள்ளது. சிறுவனைத் தாக்கிய சம்பவம் தொடர்பாக அவர்கள் மீது இந்த நடவடிக்கை எடுக்கப்பட்டுள்ளதாகத் தெரிவிக்கப்பட்டுள்ளது.
இதற்கிடையில், இந்தச் சம்பவம் குறித்து கல்வித்துறையும் விசாரணைக்கு உத்தரவிட்டுள்ளது. தனியார் பள்ளிகள் மாவட்டக் கல்வி அலுவலர் தலைமையில், பள்ளியில் நடைபெற்ற சம்பவம் தொடர்பாக விரிவான விசாரணை நடத்தி அறிக்கை சமர்ப்பிக்க வேண்டும் என்று மாவட்ட முதன்மைக் கல்வி அலுவலர் ஆணை பிறப்பித்துள்ளார். விசாரணையின் அடிப்படையில் இந்த விவகாரம் தொடர்பான கூடுதல் விவரங்கள் தெரியவரும் என எதிர்பார்க்கப்படுகிறது.




கருத்துகள் (0)