செவ்வாய், நவம்பர் 17, 2026
உண்மையின் குரல்
தமிழகம்

ராமநாதபுரம் அழகன்குளத்தில் 2,000 ஆண்டுகள் பழமையான வரலாற்றுச் சின்னங்கள் கண்டுபிடிப்பு!

ராமநாதபுரம் அழகன்குளத்தில் 2,000 ஆண்டுகள் பழமையான வரலாற்றுச் சின்னங்கள் கண்டுபிடிப்பு!

தமிழகத்தின் தொன்மையான வரலாற்றைப் பறைசாற்றும் வகையில், ராமநாதபுரம் மாவட்டம் அழகன்குளத்தில் மேற்கொள்ளப்பட்ட கள ஆய்வில் சுமார் 2,000 ஆண்டுகள் பழமையான வரலாற்றுத் தடயங்கள் கண்டறியப்பட்டுள்ளன. இந்த ஆய்வின்போது பல்வேறு காலகட்டங்களைச் சேர்ந்த அரிய நாணயங்களும் உலோகப் பொருட்களும் கிடைத்திருப்பது வரலாற்று ஆர்வலர்களிடையே கவனத்தை ஏற்படுத்தியுள்ளது.

 

சென்னை உலகத் தமிழ் ஆராய்ச்சி நிறுவனத்தைச் சேர்ந்த மாணவர்கள், பேராசிரியர் மாயகிருஷ்ணன் வழிகாட்டுதலின் கீழ் அழகன்குளம் பகுதியில் இந்தக் கள ஆய்வை மேற்கொண்டனர். அப்போது கிடைத்த தொல்பொருட்கள், அந்தப் பகுதியின் பழமையான வரலாற்றையும் வெவ்வேறு காலகட்டங்களில் நிலவிய ஆட்சிகளின் தடயங்களையும் வெளிப்படுத்தும் வகையில் அமைந்துள்ளன.

 

குறிப்பாக, மேற்கு ரோமானியப் பேரரசர் இரண்டாம் வேலண்டைன் காலத்தைச் சேர்ந்த நாணயங்கள், முதலாம் ராஜராஜ சோழன் மற்றும் முதலாம் சடையவர்மன் சுந்தரபாண்டியன் ஆட்சிக்கால நாணயங்கள் கண்டெடுக்கப்பட்டுள்ளன. இதுதவிர, மதுரை சுல்தான்கள் மற்றும் கிழக்கிந்திய கம்பெனி காலத்தைச் சேர்ந்த நாணயங்களும் ஆய்வில் கிடைத்துள்ளன.

 

மேலும், நாணயங்களுடன் உலோகங்களை உருக்குவதற்குப் பயன்படுத்தப்பட்ட பொருட்களும் கண்டெடுக்கப்பட்டுள்ளன. வெவ்வேறு வரலாற்றுக் காலங்களைச் சேர்ந்த இத்தகைய பொருட்கள் ஒரே பகுதியில் கிடைத்திருப்பது அழகன்குளத்தின் தொன்மையான வரலாற்றுச் சிறப்பை எடுத்துக்காட்டுகிறது. இந்தக் கண்டுபிடிப்புகள் தமிழகத்தின் பழங்கால வரலாற்றை மேலும் அறிந்துகொள்ள உதவும் முக்கியமான தடயங்களாகப் பார்க்கப்படுகின்றன.

கருத்துகள் (0)

கருத்து தெரிவிக்க

நிர்வாகி அனுமதித்த பின் உங்கள் கருத்து வெளியாகும்.