6 முன்னாள் அதிமுக எம்.எல்.ஏ.க்கள் விவகாரம்: சபாநாயகரிடம் கூடுதல் ஆவணங்களை சமர்ப்பித்த அக்ரி கிருஷ்ணமூர்த்தி!

அதிமுகவிலிருந்து விலகி எம்.எல்.ஏ. பதவிகளை ராஜினாமா செய்த ஆறு பேருக்கு எதிரான தகுதி நீக்க மனு தொடர்பாக, அதிமுக கொறடா அக்ரி கிருஷ்ணமூர்த்தி சட்டப்பேரவைத் தலைவர் ஜே.சி.டி. பிரபாகரிடம் கூடுதல் ஆவணங்களைச் சமர்ப்பித்துள்ளார். சட்டப்பேரவையில் கட்சியின் கொறடா உத்தரவை மீறிச் செயல்பட்டதாகக் கூறி, இந்த ஆறு பேருக்கும் எதிராக அதிமுக ஏற்கெனவே மனு அளித்திருந்தது.

மரகதம் குமரவேல், சத்தியபாமா, இசக்கி சுப்பையா, ஜெயக்குமார், எம்.ஆர். விஜயபாஸ்கர், சி. விஜயபாஸ்கர் ஆகியோர் இந்த மனுவில் குறிப்பிடப்பட்டுள்ளனர். தகுதி நீக்க மனு மீது முடிவு எடுக்கப்படுவதற்கு முன்பாகவே அவர்கள் தங்களது எம்.எல்.ஏ. பதவிகளை ராஜினாமா செய்தனர். அவர்களின் ராஜினாமாக்களை சபாநாயகர் ஏற்றுக்கொண்டார்.

இதனை எதிர்த்து தொடரப்பட்ட வழக்கில், சென்னை உயர் நீதிமன்றம் ராஜினாமாக்களை ஏற்ற முடிவை உறுதி செய்ததுடன், நிலுவையில் உள்ள தகுதி நீக்க மனுக்கள் மீது இரண்டு மாதங்களுக்குள் உரிய நடவடிக்கை எடுக்கவும் உத்தரவிட்டது. இதையடுத்து, அதிமுகவின் உள்கட்சி விதிகள், விளக்கங்கள் மற்றும் கூடுதல் சான்றுகள் அடங்கிய ஆவணங்களை அக்ரி கிருஷ்ணமூர்த்தி சபாநாயகரிடம் நேரில் வழங்கியுள்ளார். இந்த மனுக்கள் தொடர்பாக சபாநாயகர் எடுக்கவுள்ள முடிவு கவனத்தைப் பெற்றுள்ளது.