இந்தியாவில் வேலையின்மை விகிதம் சரிவு – அக்டோபரில் 4.9 சதவீதமாகக் குறைந்தது!

இந்தியாவில் வேலைவாய்ப்பு தொடர்பான நிலவரத்தில் கடந்த ஆண்டுடன் ஒப்பிடும்போது முன்னேற்றம் ஏற்பட்டுள்ளதாக மத்திய புள்ளியியல் மற்றும் திட்ட அமலாக்க அமைச்சகம் வெளியிட்டுள்ள ஆய்வறிக்கையில் தெரிவிக்கப்பட்டுள்ளது. நாட்டின் ஒட்டுமொத்த வேலையின்மை விகிதம் 2026 அக்டோபர் மாதத்தில் குறைந்துள்ளதாகப் பதிவாகியுள்ளது.
அமைச்சகத்தின் புள்ளிவிவரங்களின்படி, கடந்த 2025ஆம் ஆண்டு அக்டோபர் மாதத்தில் இந்தியாவின் ஒட்டுமொத்த வேலையின்மை விகிதம் 5.2 சதவீதமாக இருந்தது. இந்த நிலையில், நடப்பு 2026ஆம் ஆண்டு அக்டோபர் மாதத்தில் அது 4.9 சதவீதமாகக் குறைந்துள்ளது. இதன் மூலம் ஓராண்டு கால இடைவெளியில் வேலையின்மை விகிதத்தில் 0.3 சதவீதப் புள்ளிகள் சரிவு ஏற்பட்டுள்ளது.
பகுதி வாரியாகப் பார்க்கும்போது, கிராமப்புறங்களில் வேலையின்மை விகிதம் 4.2 சதவீதமாகவும், நகர்ப்புறங்களில் 6.7 சதவீதமாகவும் பதிவாகியுள்ளது. கிராமப்புறங்களுடன் ஒப்பிடுகையில் நகர்ப்புறங்களில் வேலையின்மை விகிதம் அதிகமாக இருப்பது இந்தப் புள்ளிவிவரங்கள் மூலம் தெரியவந்துள்ளது.
மேலும், 2026 செப்டம்பர் மாதத்தில் நாட்டின் ஒட்டுமொத்த வேலையின்மை விகிதம் 5 சதவீதமாக இருந்தது. அடுத்த மாதமான அக்டோபரில் இது 4.9 சதவீதமாகக் குறைந்துள்ளது. கடந்த மாதத்துடன் ஒப்பிடும்போதும் வேலையின்மை விகிதத்தில் சிறிய அளவிலான சரிவு ஏற்பட்டுள்ளதாக அமைச்சகத்தின் ஆய்வறிக்கை சுட்டிக்காட்டுகிறது.




கருத்துகள் (0)