மதுபோதையில் ஏற்பட்ட தகராறு விபரீதம்: சக தொழிலாளியை கட்டையால் அடித்துக் கொன்ற இளைஞர் கைது!

செங்கல்பட்டு மாவட்டம் ஊரப்பாக்கத்தில் மது அருந்தியபோது ஏற்பட்ட தகராறு கொலையில் முடிந்த சம்பவம் அதிர்ச்சியை ஏற்படுத்தியுள்ளது. ஒன்றாக வேலை செய்து வந்த இரு தொழிலாளர்களுக்கு இடையே ஏற்பட்ட வாக்குவாதம் முற்றியதில், ஒருவர் கட்டையால் தாக்கப்பட்டு உயிரிழந்தார். இந்தச் சம்பவம் தொடர்பாக மற்றொரு தொழிலாளியை போலீசார் கைது செய்து விசாரணை நடத்தி வருகின்றனர்.
கிருஷ்ணகிரி மாவட்டத்தைச் சேர்ந்த முனிராஜ் (38), ஊரப்பாக்கம் பகுதியில் உள்ள சென்ட்ரிங் கடையில் தங்கி வேலை பார்த்து வந்தார். அதே கடையில் சென்னையைச் சேர்ந்த லட்சுமணன் (34) என்பவரும் பணியாற்றி வந்தார். இருவரும் ஒரே இடத்தில் வேலை செய்து வந்த நிலையில், நேற்று முன்தினம் இரவு ஒன்றாக மது அருந்திவிட்டு திரும்பியுள்ளனர்.
அப்போது இருவருக்கும் இடையே திடீரென வாக்குவாதம் ஏற்பட்டுள்ளது. இந்தத் தகராறு தொடர்ந்து முற்றிய நிலையில், ஆத்திரமடைந்த லட்சுமணன் அங்கிருந்த உருட்டுக்கட்டையை எடுத்து முனிராஜின் தலையில் தாக்கியுள்ளார். இதில் பலத்த காயமடைந்த முனிராஜ் சம்பவ இடத்திலேயே உயிரிழந்ததாகத் தெரிவிக்கப்பட்டுள்ளது.
இதுகுறித்து தகவல் அறிந்த போலீசார் சம்பவ இடத்திற்குச் சென்று விசாரணை மேற்கொண்டனர். தொடர்ந்து, முனிராஜை தாக்கிக் கொலை செய்ததாக லட்சுமணனை கைது செய்தனர். மதுபோதையில் ஏற்பட்ட தகராறு சக தொழிலாளியின் உயிரைப் பறித்த சம்பவம் அப்பகுதியில் பரபரப்பை ஏற்படுத்தியுள்ளது.




கருத்துகள் (0)