இரவு உணவு சாப்பிட்ட உடனே தூங்குகிறீர்களா? உடலில் ஏற்படும் பாதிப்புகள் குறித்து மருத்துவர்கள் எச்சரிக்கை!

பலருக்கும் இரவு உணவு சாப்பிட்டதும் உடனடியாக படுக்கைக்குச் செல்லும் பழக்கம் உள்ளது. ஆனால் இந்தப் பழக்கம் உடல்நலத்தில் சில பாதிப்புகளை ஏற்படுத்தக்கூடும் என மருத்துவர்கள் எச்சரிக்கின்றனர். குறிப்பாக சாப்பிட்ட உடனே படுத்தால் வயிற்றில் உள்ள அமிலம் உணவுக்குழாய் வழியாக மேலே வருவதற்கு வாய்ப்புள்ளது. இதனால் நெஞ்செரிச்சல், புளித்த ஏப்பம் போன்ற பிரச்சினைகள் ஏற்படலாம். மேலும் வயிறு உப்புசம், அஜீரணம் மற்றும் செரிமான அசௌகரியமும் உண்டாகலாம்.

அதேபோல் வயிறு நிறைந்த நிலையில் படுப்பதால் தூக்கத்தின் தரம் பாதிக்கப்படலாம். இரவு நேரத்தில் ஏற்படும் செரிமானப் பிரச்சினைகள் அன்றாட வாழ்க்கையையும் பாதிக்கக்கூடும். எனவே இரவு உணவை முடித்தவுடன் படுக்காமல் சிறிது நேரம் அமர்ந்திருப்பது அல்லது மெதுவாக நடப்பது நல்லது. குறிப்பாக இரவு உணவுக்கும் உறங்கச் செல்வதற்கும் இடையே குறைந்தது 2 முதல் 3 மணி நேர இடைவெளி கடைப்பிடிப்பது நெஞ்செரிச்சல் மற்றும் அமிலப் பின்னோட்டப் பிரச்சினைகளைத் தவிர்க்க உதவும்.