மது விற்பனை அதிகரிப்பது சாதனையல்ல… வெட்கப்பட வேண்டிய விஷயம்… வெளிப்படையாகப் பேசிய அமைச்சர் விக்னேஷ்… 234 தொகுதிகளிலும் புதிய திட்டம்..!!

தமிழகத்தில் மதுபான விற்பனை தொடர்ந்து அதிகரித்து வருவது பெருமைப்பட வேண்டிய விஷயம் அல்ல என்றும், அனைவரும் வெட்கப்பட வேண்டிய ஒன்று என்றும் மதுவிலக்கு மற்றும் ஆயத்தீர்வைத் துறை அமைச்சர் விக்னேஷ் தெரிவித்துள்ளார்.

சமீபத்தில் நடைபெற்ற தீபாவளி பண்டிகையின்போது, தமிழகம் முழுவதும் உள்ள டாஸ்மாக் கடைகளில் இரண்டு நாட்களில் சுமார் ரூ.441 கோடிக்கு மேல் மதுபானங்கள் விற்பனையாகியுள்ளதாகத் தகவல் வெளியாகியுள்ளது.

இதுகுறித்துப் பேசிய அமைச்சர் விக்னேஷ், டாஸ்மாக் கடைகளின் வருவாய் அதிகரிப்பதைப் பெரிய சாதனையாகச் செய்திகள் வெளியிடுவதைத் தவிர்க்க வேண்டும் என்று கேட்டுக்கொண்டார். இதுபோன்ற செய்திகள் பொதுமக்களுக்கு எந்தப் பயனையும் அளிக்காது என்றும் அவர் குறிப்பிட்டார்.

மேலும், மதுவினால் ஏற்படும் பாதிப்புகள் குறித்து மக்களிடையே விழிப்புணர்வை ஏற்படுத்தி, உளவியல் ரீதியான ஆலோசனைகள் மூலம் மது அருந்தும் பழக்கத்தைக் குறைப்பதே அரசின் முக்கிய நோக்கம் என்றும் தெரிவித்தார்.

இதன் ஒரு பகுதியாக, தமிழகத்தின் அனைத்து 234 சட்டமன்றத் தொகுதிகளிலும் போதை மறுவாழ்வு மையங்களை அமைப்பது அரசின் முக்கிய இலக்காக இருப்பதாகவும் அவர் கூறியுள்ளார்.

இதற்கிடையே, தீபாவளி பண்டிகையின்போது டாஸ்மாக் கடைகளில் க்யூஆர் கோடு மூலம் பணம் செலுத்துவதில் சிக்கல் ஏற்பட்டதாக எழுந்த புகார்கள் குறித்தும் விசாரணை நடத்தப்படும் என அமைச்சர் தெரிவித்துள்ளார். விசாரணையில் முறைகேடு அல்லது அலட்சியம் இருப்பது உறுதி செய்யப்பட்டால் சம்பந்தப்பட்டவர்கள் மீது உரிய நடவடிக்கை எடுக்கப்படும் என்றும் அவர் உறுதியளித்துள்ளார்.

மதுவிற்பனை வருவாயை விட மதுப் பழக்கத்தைக் கட்டுப்படுத்துவதற்கும், மறுவாழ்வு நடவடிக்கைகளுக்கும் முக்கியத்துவம் அளிக்க வேண்டும் என்ற அமைச்சரின் கருத்து தற்போது பேசுபொருளாகியுள்ளது.