திருச்சி காமராசர் அறிவுலக நூல் கொள்முதல் ஆணை ரத்து! பதிப்பாளர்கள் அதிருப்தி

கோவை பெரியார் அறிவுலகத்தில் நூல்கள் கொள்முதல் செய்ததில் முறைகேடுகள் நடைபெற்றதாக எழுந்த புகார்களைத் தொடர்ந்து, தமிழக அரசு மற்றொரு முக்கிய நடவடிக்கையை எடுத்துள்ளது. திருச்சியில் உள்ள காமராசர் அறிவுலகத்திற்காகப் புத்தகங்கள் வாங்குவதற்கு ஏற்கெனவே வழங்கப்பட்ட கொள்முதல் ஆணையை அரசு ரத்து செய்துள்ளது. இந்த முடிவு பதிப்பகத் துறையினர் மத்தியில் அதிருப்தியை ஏற்படுத்தியுள்ளது.

காமராசர் அறிவுலகத்திற்குத் தமிழ் மற்றும் ஆங்கில மொழிகளில் நூல்களைக் கொள்முதல் செய்வதற்காகப் பதிப்பாளர்களுக்கு ஆணைகள் வழங்கப்பட்டிருந்தன. இந்நிலையில், அந்தக் கொள்முதல் ஆணை ரத்து செய்யப்படுவதாக சம்பந்தப்பட்ட பதிப்பாளர்களுக்கு மின்னஞ்சல் மூலம் தகவல் அனுப்பப்பட்டுள்ளதாகக் கூறப்படுகிறது. கோவை பெரியார் அறிவுலக நூல் கொள்முதல் தொடர்பான சர்ச்சையின் தொடர்ச்சியாகவே இந்த நடவடிக்கை எடுக்கப்பட்டுள்ளதாகத் தெரிகிறது.

அரசின் இந்த முடிவுக்கு சில பதிப்பாளர்கள் எதிர்ப்பு தெரிவித்துள்ளனர். நூல் கொள்முதல் தொடர்பாக ஒரு சிலர் தவறு செய்திருந்தால், அதற்காக ஒட்டுமொத்தப் பதிப்பாளர்களுக்கும் வழங்கப்பட்ட ஆணைகளை ரத்து செய்வது எந்த வகையில் நியாயம் என அவர்கள் கேள்வி எழுப்பியுள்ளனர். தவறு செய்தவர்கள் மீது உரிய நடவடிக்கை எடுப்பதற்குப் பதிலாக, அனைவரையும் பாதிக்கும் வகையில் முடிவு எடுக்கப்பட்டுள்ளதாகவும் தங்களது அதிருப்தியை வெளிப்படுத்தியுள்ளனர்.

இந்த நடவடிக்கையால் ஏற்கெனவே புத்தகக் கொள்முதல் ஆணைகளைப் பெற்றிருந்த பதிப்பாளர்கள் பாதிக்கப்பட்டுள்ளதாகக் கூறப்படுகிறது. இதுதொடர்பாக தமிழக அரசு அடுத்தகட்டமாக என்ன நடவடிக்கை எடுக்கப் போகிறது என்ற எதிர்பார்ப்பு பதிப்பகத் துறையினர் மத்தியில் எழுந்துள்ளது.