பெற்றோரை கொலை செய்துவிட்டு 10 வயது மகனையே நாடகமாட வைத்த கொடூரம்... பெங்களூருவில் அதிர்ச்சி சம்பவம்!

கர்நாடக மாநிலம் பெங்களூருவில் சங்கர் மற்றும் நளினி என்ற தம்பதியர் கொடூரமாகக் கொலை செய்யப்பட்ட சம்பவத்தில், கொலையை மறைப்பதற்காக அவர்களது 10 வயது மகனையே குற்றவாளி பயன்படுத்திய அதிர்ச்சித் தகவல் வெளியாகியுள்ளது. தம்பதியருடன் நெருங்கிய தொடர்பில் இருந்த இந்துசேகர் என்பவர், பெற்றோர் மாயமான அதே நாளில் சிறுவனைத் தனது கட்டுப்பாட்டுக்குள் கொண்டு வந்துள்ளார். பெற்றோருக்கு என்ன நடந்தது என்பது தெரியாமல் தவித்த சிறுவனிடம், அவர்கள் ஆன்மிகப் பயணத்திற்குச் சென்றுள்ளதாகக் கூறி காரில் அழைத்துச் சென்றுள்ளார்.

உறவினர்களுக்குச் சந்தேகம் ஏற்படாமல் இருக்க, சிறுவனை நேரடியாகப் பேசவிடாமல் பெற்றோரின் செல்போன்கள் மூலம் குரல் பதிவுகளை அனுப்ப இந்துசேகர் கட்டாயப்படுத்தியதாகக் கூறப்படுகிறது. முதலில் பெற்றோர் கோயிலுக்குச் சென்றிருப்பதாகவும், பின்னர் வட இந்தியாவில் மூன்று மாத சுற்றுப்பயணம் மேற்கொண்டுள்ளதாகவும் சிறுவனைப் பொய்யான தகவல்களைப் பதிவு செய்ய வைத்துள்ளார். இதற்கிடையில், காரில் துர்நாற்றம் வீசிய சாக்கு மூட்டைகளில் தம்பதியரின் உடல்களை மறைத்து, நந்தி மலைப் பகுதியில் வீசியதாகவும் சிறுவனின் வாக்குமூலத்தின் மூலம் தெரியவந்துள்ளது.

இந்த வழக்கின் விசாரணையில் மேலும் பல அதிர்ச்சிகரமான தகவல்கள் வெளியாகியுள்ளன. இந்த இரட்டைக் கொலையுடன் மட்டுமின்றி, தனது மனைவி உள்ளிட்ட மொத்தம் ஆறு குடும்ப உறுப்பினர்களைக் கொலை செய்து வெவ்வேறு இடங்களில் உடல்களை வீசியிருக்கலாம் என இந்துசேகர் மீது போலீசார் சந்தேகம் தெரிவித்துள்ளனர். காணாமல் போனவர்களின் செல்போன் சிக்னல்களை ஆய்வு செய்து விசாரணையைத் தீவிரப்படுத்திய காவல்துறையினர், இந்துசேகரைக் கைது செய்து சிறையில் அடைத்துள்ளனர்.

பெற்றோர் உயிருடன் இருப்பதாக நம்ப வைக்கப்பட்ட 10 வயது சிறுவன், ஐந்து நாட்களாக அவர்களின் மரணத்தை மறைக்கும் வகையில் பொய்யான தகவல்களைத் தெரிவிக்க நிர்பந்திக்கப்பட்டுள்ளான். தற்போது அந்தச் சிறுவன் போலீசாரின் பாதுகாப்பில் ஒப்படைக்கப்பட்டுள்ள நிலையில், இந்தச் சம்பவத்தின் பின்னணி மற்றும் மேலும் யாருக்காவது தொடர்பு உள்ளதா என்பது குறித்து விசாரணை தொடர்ந்து நடைபெற்று வருகிறது. ஒரு குடும்பத்தையே சிதைத்துள்ள இந்தச் சம்பவம் பெங்களூருவில் பெரும் அதிர்ச்சியையும் சோகத்தையும் ஏற்படுத்தியுள்ளது.