தொடர் இரவுப் பணி உடல்நலத்தைப் பாதிக்குமா? சர்க்கரை நோய் முதல் ஹார்மோன் மாற்றம் வரை ஏற்படும் அபாயம்!

கார்ப்பரேட் நிறுவனங்களின் வளர்ச்சிக்குப் பிறகு பல்வேறு துறைகளில் வேலை நேர முறைகளும் மாறியுள்ளன. குறிப்பாக, மென்பொருள் உள்ளிட்ட துறைகளில் பணியாற்றும் ஏராளமான ஊழியர்கள் இரவு நேரப் பணியில் ஈடுபட்டு வருகின்றனர். இரவு முழுவதும் வேலை செய்துவிட்டு பகல் நேரத்தில் ஓய்வெடுக்கும் இந்த நடைமுறை, நீண்ட காலத்தில் உடல்நலத்தில் பாதிப்புகளை ஏற்படுத்தக்கூடும் என மருத்துவர்கள் எச்சரிக்கின்றனர்.

தொடர்ந்து இரவு நேரத்தில் பணியாற்றுவதால் உடலின் இயல்பான தூக்கம் மற்றும் விழிப்பு நேரச் சுழற்சி சீர்குலைய வாய்ப்புள்ளது. இதன் காரணமாக டைப் 2 நீரிழிவு நோய், இதயப் பாதிப்புகள் மற்றும் ஹார்மோன் சமநிலையின்மை உள்ளிட்ட பிரச்சினைகள் உருவாகும் அபாயம் இருப்பதாக ஆய்வுகள் சுட்டிக்காட்டுகின்றன.

மேலும், ஆண்களின் டெஸ்டோஸ்டிரோன் மற்றும் பெண்களின் ஈஸ்ட்ரோஜன் ஹார்மோன் சுரப்பிலும் மாற்றங்கள் ஏற்படலாம் என்றும், இது இனப்பெருக்க ஆரோக்கியத்தைப் பாதிக்கக்கூடும் என்றும் ஆய்வில் குறிப்பிடப்பட்டுள்ளது. இரவு நேரப் பணிக்குப் பிறகு பகல் முழுவதும் வீட்டுக்குள் தூங்குவதால் சூரிய ஒளி கிடைப்பது குறைந்து, வைட்டமின் டி குறைபாடு ஏற்படுவதற்கான வாய்ப்பும் உள்ளது.

உடல்நல பாதிப்புகள் குறித்த எச்சரிக்கைகள் இருந்தாலும், பணிச்சூழல் மற்றும் வேலை சார்ந்த தேவைகள் காரணமாகப் பலர் தொடர்ந்து இரவு நேரப் பணியை மேற்கொண்டு வருகின்றனர். எனவே, போதிய தூக்கம், சீரான உணவுப் பழக்கம் மற்றும் உடல்நலக் கண்காணிப்பு ஆகியவற்றில் கவனம் செலுத்துவது அவசியமாகிறது.