தாம்பரம் அடுத்த சேலையூர் பகுதியில் 5-க்கும் மேற்பட்ட தெருநாய்கள் அடுத்தடுத்து உயிரிழந்து கிடந்த சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது. மர்ம நபர்கள் நாய்களுக்கு விஷம் கொடுத்துக் கொன்றார்களா என்ற கோணத்தில் போலீசார் விசாரணை நடத்தி வருகின்றனர்.

சேலையூர் ஹாரிங்டன் சாலையில் நேற்று இரவு, வாயில் ரத்தம் வழிந்த நிலையில் 5-க்கும் மேற்பட்ட தெருநாய்கள் இறந்து கிடந்தன. இதைக் கண்ட அப்பகுதி மக்கள் உடனடியாக போலீசாருக்குத் தகவல் தெரிவித்தனர்.

தகவலறிந்து சம்பவ இடத்திற்கு வந்த சேலையூர் போலீசார், உயிரிழந்த நாய்களின் உடல்களை மீட்டு கால்நடை மருத்துவமனைக்கு அனுப்பி வைத்தனர். நாய்களின் உயிரிழப்புக்கான காரணம் குறித்து விசாரணை நடைபெற்று வருகிறது.

மேலும், மர்ம நபர்கள் விஷம் வைத்துக் கொன்றிருக்கலாம் என்ற சந்தேகத்தின் அடிப்படையில், அப்பகுதியில் உள்ள கண்காணிப்பு கேமரா (CCTV) காட்சிகளை போலீசார் ஆய்வு செய்து வருகின்றனர்.

ஏற்கனவே மாடம்பாக்கம் பகுதியில் இதேபோன்று தெருநாய்கள் கொல்லப்பட்டதாகக் கூறப்படும் நிலையில், சேலையூரில் அடுத்தடுத்து நாய்கள் உயிரிழந்த சம்பவம் அப்பகுதி மக்களிடையே அச்சத்தையும் அதிர்ச்சியையும் ஏற்படுத்தியுள்ளது.

நாய்களின் உயிரிழப்புக்கான உண்மையான காரணம் மருத்துவப் பரிசோதனை மற்றும் போலீஸ் விசாரணையின் முடிவிலேயே தெரியவரும்.