அரிசி, பருப்பு உள்ளிட்ட அத்தியாவசிய உணவுப் பொருட்களின் விலை உயர்வு என்பது உருவாக்கப்பட்ட ஒரு பிம்பம் என்று அமைச்சர் வெங்கடராமன் கூறியிருப்பதற்கு அமமுக பொதுச்செயலாளர் டிடிவி தினகரன் கடும் கண்டனம் தெரிவித்துள்ளார். அமைச்சரின் கருத்து அவரது அறியாமையை வெளிப்படுத்துவதாகவும் அவர் விமர்சித்துள்ளார்.

அரிசி உள்ளிட்ட அத்தியாவசியப் பொருட்களின் விலை தற்போது கணிசமாக உயர்ந்துள்ளதாகக் குறிப்பிட்ட டிடிவி தினகரன், விலை உயர்வை பண்டிகைக் காலத்தில் வழக்கமாக ஏற்படும் மாற்றமாகக் கூறி மக்களின் கவனத்தைத் திசைதிருப்ப அமைச்சர் முயற்சிப்பதாகக் குற்றம்சாட்டியுள்ளார்.

மேலும், உணவுப் பொருட்களின் விலை உயர்வு பொதுமக்களின் குடும்பச் செலவுகளில் தாக்கத்தை ஏற்படுத்தும் நிலையில், அதை வெறும் பிம்பம் என்று புறக்கணிக்க முடியாது என அவர் தெரிவித்துள்ளார்.

எனவே, அரிசி, பருப்பு உள்ளிட்ட அத்தியாவசிய உணவுப் பொருட்களின் விலையைக் கட்டுப்படுத்த அரசு உரிய நடவடிக்கைகளை உடனடியாக மேற்கொள்ள வேண்டும் என்றும் டிடிவி தினகரன் வலியுறுத்தியுள்ளார்.