“பாஜக அரசின் நாட்கள் எண்ணப்படுகின்றன!” – தமிழிசையை விமர்சித்த காங்கிரஸ் பொதுச்செயலாளர் கணபதி சிவக்குமார்!

மத்தியில் ஆளும் பாஜக அரசின் நாட்கள் எண்ணப்பட்டு வருவதாக தமிழ்நாடு காங்கிரஸ் கமிட்டி பொதுச்செயலாளர் கணபதி சிவக்குமார் கடுமையாக விமர்சித்துள்ளார்.

மாணவர்களுக்கு எதிரான பாஜகவினரின் அணுகுமுறையை மக்களவை எதிர்க்கட்சித் தலைவர் ராகுல் காந்தி நேரடியாகக் களத்தில் இறங்கி எதிர்த்து வருவதாக அவர் தெரிவித்துள்ளார்.

மாணவர்கள் மற்றும் இளைஞர்களின் நலனுக்காக ராகுல் காந்தி தொடர்ந்து குரல் கொடுத்து வருவதாகக் குறிப்பிட்ட கணபதி சிவக்குமார், அவரது செயல்பாடுகளைத் தாங்கிக்கொள்ள முடியாமல் பாஜக மூத்த தலைவர் தமிழிசை சௌந்தரராஜன் விமர்சனங்களை முன்வைத்து வருவதாகக் குற்றம்சாட்டியுள்ளார்.

மேலும், “மாணவர்களும் இளைஞர்களும் ராகுல் காந்தியுடன் கைகோர்த்துப் பயணிக்கத் தொடங்கிவிட்டனர். பாஜக அரசின் நாட்கள் எண்ணப்படுகின்றன” எனத் தனது கருத்தைப் பதிவு செய்துள்ளார்.

ராகுல் காந்திக்கு இளைஞர்கள் மத்தியில் ஆதரவு அதிகரித்து வருவதாக கணபதி சிவக்குமார் தெரிவித்துள்ள நிலையில், பாஜக மற்றும் காங்கிரஸ் இடையேயான அரசியல் விமர்சனங்கள் மீண்டும் கவனத்தை ஈர்த்துள்ளன.