தசரா விழாவில் சாதி அடையாளத்துடன் ரீல்ஸ்: இளைஞரை எச்சரித்த போலீசார்!

தூத்துக்குடி மாவட்டம் குலசேகரன்பட்டினம் தசரா விழாவில் சாதி அடையாளங்களை முன்னிறுத்தி வீடியோக்களைப் பதிவிடத் தடை விதிக்கப்பட்டிருந்ததாகக் கூறப்படுகிறது. இந்நிலையில், நெல்லையைச் சேர்ந்த மாயகிருஷ்ணன் (20) என்பவர் சாதி அடையாளத்துடன் எடுத்த வீடியோவை இன்ஸ்டாகிராமில் ரீல்ஸாகப் பதிவிட்டதாகத் தகவல் வெளியாகியுள்ளது. இதையடுத்து அவரைப் பிடித்த போலீசார், இதுபோன்ற பதிவுகள் தொடர்பாக எச்சரிக்கை விடுத்துள்ளனர்.

மேலும், சாதி ரீதியான அடையாளங்களுடன் சமூக வலைதளங்களில் ரீல்ஸ் வெளியிட்டால் கைது நடவடிக்கை எடுக்கப்படலாம் என்றும், யாரும் இதுபோன்ற செயல்களில் ஈடுபட வேண்டாம் என்றும் அந்த இளைஞரைக் கொண்டே விழிப்புணர்வு வீடியோ பதிவு செய்து சமூக வலைதளங்களில் வெளியிட்டதாகக் கூறப்படுகிறது. விழாக்களின் போது சாதி மோதல்களைத் தூண்டும் வகையிலான பதிவுகளைத் தவிர்க்க வேண்டும் என்பதே போலீசாரின் எச்சரிக்கையாக உள்ளது.