சென்னை குடியிருப்புக்குள் புகுந்த 6 அடி நீள மலைப்பாம்பு! வனத்துறையினர் பாதுகாப்பாக மீட்பு!

சென்னை பெருங்களத்தூர் அருகே உள்ள கணபதி நகர் குடியிருப்புப் பகுதியில் இன்று (நவம்பர் 2) காலை எதிர்பாராத விதமாக 6 அடி நீளமுள்ள மலைப்பாம்பு ஒன்று புகுந்தது. குடியிருப்புகளுக்கு அருகே பாம்பு ஊர்ந்து செல்வதைக் கண்ட அப்பகுதி மக்கள் அச்சமடைந்தனர். இதனால் அந்தப் பகுதியில் சிறிது நேரம் பரபரப்பான சூழல் நிலவியது. இதுகுறித்து வனத்துறையினருக்கு தகவல் தெரிவிக்கப்பட்டதைத் தொடர்ந்து, விரைந்து வந்த அதிகாரிகள் மலைப்பாம்பை லாவகமாகப் பிடித்து பாதுகாப்பாக மீட்டனர். பின்னர் அதை அடர்ந்த வனப்பகுதியில் விடுவிப்பதற்காக எடுத்துச் சென்றனர்.

இதற்கிடையே, மழைக்காலங்களில் பாம்புகள் தங்குமிடம் தேடி வீடுகள் மற்றும் குடியிருப்புப் பகுதிகளுக்குள் வருவதற்கான வாய்ப்புகள் இருப்பதாக வனத்துறையினர் எச்சரித்துள்ளனர். எனவே, வீடுகளைச் சுற்றியுள்ள பகுதிகளில் புதர்கள் மற்றும் தேவையற்ற பொருட்கள் குவியாமல் பார்த்துக்கொள்ள வேண்டும் என்றும், சுற்றுப்புறத்தைத் தூய்மையாகப் பராமரிக்க வேண்டும் என்றும் பொதுமக்களுக்கு அறிவுறுத்தியுள்ளனர்.