மாதம் ரூ.5,000 சேமித்தால் 5 ஆண்டுகளில் ரூ.3.56 லட்சம் பெறலாம்! அஞ்சல் துறையின் RD திட்டம்!

குறைந்த தொகையை மாதந்தோறும் ஒதுக்கி வைத்து எதிர்காலத்திற்கான சேமிப்பை உருவாக்க விரும்புபவர்களுக்கு அஞ்சல் துறையின் தொடர் வைப்பு நிதி (Post Office RD) திட்டம் ஒரு வாய்ப்பாக உள்ளது. குறிப்பாக, ஒரே நேரத்தில் பெரிய தொகையை முதலீடு செய்ய முடியாதவர்கள் மாதந்தோறும் குறிப்பிட்ட தொகையைச் செலுத்தி இந்தத் திட்டத்தில் சேமிக்கலாம். 5 ஆண்டுகள் என நிர்ணயிக்கப்பட்டுள்ள முதிர்வுக் காலத்தைக் கொண்ட இத்திட்டத்திற்கு தற்போது ஆண்டுக்கு 6.7 சதவீத வட்டி வழங்கப்படுகிறது.

இந்தத் திட்டத்தில் மாதந்தோறும் ரூ.5,000 வீதம் 60 மாதங்களுக்கு தொடர்ந்து முதலீடு செய்தால், ஐந்து ஆண்டுகளில் உங்கள் மொத்த சேமிப்பு ரூ.3 லட்சமாக இருக்கும். இதற்கு கிடைக்கும் வட்டியாக சுமார் ரூ.56,830 சேர்க்கப்படும். இதன் மூலம் திட்டத்தின் முதிர்வுக் காலம் முடிவடையும்போது முதலீடு செய்த தொகை மற்றும் வட்டி சேர்த்து மொத்தம் சுமார் ரூ.3,56,830 கிடைக்கும். சிறிய தொகையைத் தொடர்ந்து சேமிக்கும் பழக்கத்தை உருவாக்குவதுடன், குறிப்பிட்ட காலத்திற்குப் பிறகு கணிசமான தொகையைப் பெறவும் இந்தத் திட்டம் உதவுகிறது. இருப்பினும், முதலீடு செய்வதற்கு முன்பு நடைமுறையில் உள்ள வட்டி விகிதம் மற்றும் திட்ட விதிமுறைகளை அஞ்சல் அலுவலகத்தில் உறுதிப்படுத்திக் கொள்வது அவசியம்.