மேட்டூர் அணை நீர்மட்டம் 59 அடியாகச் சரிவு.. சம்பா சாகுபடிக்கு தண்ணீர் கிடைக்குமா?

மேட்டூர் அணையின் நீர்மட்டம் தொடர்ந்து குறைந்து வருவதால் காவிரி டெல்டா விவசாயிகள் கவலையில் உள்ளனர். அக்டோபர் 14ஆம் தேதி மாலை நிலவரப்படி, அணையின் நீர்மட்டம் 59.13 அடியாகக் குறைந்துள்ளது. அணைக்கு வரும் நீர்வரத்து வினாடிக்கு 696 கன அடியாகச் சரிந்துள்ள நிலையில், டெல்டா பாசனத்திற்காக வினாடிக்கு 12,000 கன அடி தண்ணீர் திறக்கப்படுகிறது.

இதன் காரணமாக அணையின் நீர் இருப்பு 24.04 டிஎம்சியாகக் குறைந்துள்ளது. ஒருபுறம் நீர்வரத்து குறைவாகவும், மறுபுறம் பாசனத்திற்கான நீர் திறப்பு அதிகமாகவும் இருப்பதால் அணையின் நீர்மட்டம் மேலும் குறையுமோ என்ற கவலை எழுந்துள்ளது. தற்போதைய சூழலில், சம்பா சாகுபடிக்குத் தேவையான தண்ணீர் தொடர்ந்து கிடைக்குமா என்ற கேள்வி டெல்டா விவசாயிகள் மத்தியில் எழுந்துள்ளது.