தீபாவளியை முன்னிட்டு ரயில்வே ஊழியர்களுக்கு 78 நாட்கள் ஊதியம் போனஸ் – 11.40 லட்சம் பேர் பயனடைவார்கள்!

தீபாவளி பண்டிகையை முன்னிட்டு நாடு முழுவதும் உள்ள ரயில்வே ஊழியர்களுக்கு மகிழ்ச்சியளிக்கும் வகையில், 78 நாட்களுக்கான ஊதியத்தை போனஸாக வழங்க மத்திய அமைச்சரவை ஒப்புதல் அளித்துள்ளதாக அறிவிக்கப்பட்டுள்ளது.

இந்த அறிவிப்பின் மூலம் இந்திய ரயில்வேயில் பணியாற்றும் சுமார் 11.40 லட்சம் அரசிதழ் பதிவு பெறாத (Non-Gazetted) ஊழியர்கள் பயனடைய உள்ளனர். போனஸ் வழங்குவதற்காக மத்திய அரசு மொத்தம் ரூ.2,009.61 கோடி நிதியை ஒதுக்க உள்ளதாக மத்திய அமைச்சர் அஸ்வினி வைஷ்ணவ் தெரிவித்துள்ளார்.

ரயில்வே பணியாளர்களின் உழைப்பை அங்கீகரிக்கும் வகையிலும், பண்டிகைக் காலத்தில் அவர்களின் பொருளாதார நலனைக் கருத்தில் கொண்டும் இந்த முடிவு எடுக்கப்பட்டுள்ளதாகத் தெரிவிக்கப்பட்டுள்ளது.

தீபாவளி பண்டிகைக்கான செலவுகளைச் சமாளிக்கவும், ஊழியர்களின் குடும்பங்களுக்குக் கூடுதல் நிதி ஆதரவை வழங்கவும் இந்த போனஸ் உதவியாக இருக்கும் என எதிர்பார்க்கப்படுகிறது.

மத்திய அமைச்சரவையின் இந்த அறிவிப்பு, நாடு முழுவதும் உள்ள லட்சக்கணக்கான ரயில்வே ஊழியர்களுக்கும் அவர்களது குடும்பத்தினருக்கும் பண்டிகைக் கால மகிழ்ச்சியை ஏற்படுத்தும் வகையில் அமைந்துள்ளது.