வடகிழக்குப் பருவமழையால் சேதமடையும் சாலைகளை உடனுக்குடன் சீரமைக்க ரூ.21.80 கோடி நிதி ஒதுக்கீடு! 12 நவீன சிறப்பு வாகனங்கள் சேவை தொடக்கம்!

தமிழகத்தில் வடகிழக்குப் பருவமழை காரணமாகச் சாலைகளில் ஏற்படும் சேதங்களை உடனடியாகச் சீரமைக்கும் வகையில், தமிழக அரசு ரூ.21.80 கோடி நிதி ஒதுக்கீடு செய்துள்ளது.

மழையால் சாலைகளில் பள்ளங்கள் மற்றும் சேதங்கள் ஏற்படும்போது, வாகன ஓட்டிகள் மற்றும் பொதுமக்கள் பெரும் சிரமங்களைச் சந்தித்து வருகின்றனர். இதனைத் தவிர்க்கும் நோக்கில், சேதமடைந்த சாலைகளை உடனுக்குடன் குளிர் தார்க்கலவை (Cold Mix) தொழில்நுட்பம் மூலம் சீரமைக்க நடவடிக்கை எடுக்கப்பட்டுள்ளது.

இதற்காக ஒதுக்கப்பட்டுள்ள ரூ.21.80 கோடியில், பேருந்து சாலைகளைச் சீரமைக்க ரூ.9.25 கோடியும், உட்புறச் சாலைகளைச் சீரமைக்க ரூ.12.55 கோடியும் செலவிடப்பட உள்ளது.

மேலும், சாலை சீரமைப்புப் பணிகளை விரைவுபடுத்தும் வகையில், புதிய தொழில்நுட்ப வசதிகளுடன் கூடிய 12 சிறப்பு வாகனங்கள் அறிமுகப்படுத்தப்பட்டுள்ளன. இந்த வாகனங்களின் சேவையை மாநகராட்சி ஆணையாளர் ஜி.எஸ்.சமீரன் இன்று கொடியசைத்துத் தொடங்கி வைத்தார்.

இந்த நவீன வாகனங்கள் மூலம் மழைக்காலங்களில் சாலைகளில் ஏற்படும் பள்ளங்களை விரைவாகக் கண்டறிந்து, குளிர் தார்க்கலவை பயன்படுத்திச் சீரமைக்க முடியும். இதனால் சாலைப் பராமரிப்புப் பணிகள் துரிதமாக நடைபெறுவதுடன், பொதுமக்களின் போக்குவரத்துச் சிரமங்களும் குறையும் என எதிர்பார்க்கப்படுகிறது.

வடகிழக்குப் பருவமழையை முன்னிட்டு தமிழக அரசு மேற்கொண்டுள்ள இந்த நடவடிக்கை வாகன ஓட்டிகள் மற்றும் பொதுமக்கள் மத்தியில் வரவேற்பைப் பெற்றுள்ளது.