கோடிக்கணக்கான சமூக வலைதளப் பின்தொடர்பவர்கள் இருந்தும் தேர்தலில் தோல்வி – இன்ஃப்ளூயன்சர் மனைவிக்கு 277 வாக்குகள் மட்டுமே!

ராஜஸ்தான் மாநிலம் பில்வாரா மாவட்டத்தில் நடைபெற்ற கிராம ஊராட்சித் தலைவர் தேர்தலில், பிரபல சமூக வலைதள இன்ஃப்ளூயன்சர் பவன் சாஹுவின் மனைவி கோமல் சாஹு தோல்வியடைந்துள்ளார். சமூக வலைதளங்களில் கோடிக்கணக்கான பின்தொடர்பவர்களைக் கொண்ட குடும்பத்தைச் சேர்ந்தவர் தேர்தலில் மிகக் குறைந்த வாக்குகளைப் பெற்றிருப்பது பேசுபொருளாகியுள்ளது.

ஃபுலியா கலான் கிராமப் பஞ்சாயத்தில் நடைபெற்ற சர்பஞ்ச் தேர்தலில் போட்டியிட்ட கோமல் சாஹுவுக்கு வெறும் 277 வாக்குகள் மட்டுமே கிடைத்துள்ளன. இதன் மூலம் அவர் மூன்றாவது இடத்துக்குத் தள்ளப்பட்டார்.

இந்தத் தேர்தலில் பகவதி லால் சோனி 1,203 வாக்குகளைப் பெற்று வெற்றி பெற்றார். இரண்டாவது இடத்தைப் பிடித்த காலுராம் ஜாட்டுக்கு 797 வாக்குகள் கிடைத்தன.

ராஜஸ்தானில் நடைபெற்ற இரண்டாம் கட்ட ஊராட்சித் தேர்தலின்போது, பில்வாரா மாவட்டத்தில் உள்ள 185 கிராமப் பஞ்சாயத்துகளில் தலைவர் மற்றும் வார்டு உறுப்பினர் பதவிகளுக்கான வாக்குப்பதிவு நடைபெற்றது. இதில் ஃபுலியா கலான் பஞ்சாயத்தின் தேர்தல் முடிவு தற்போது கவனத்தை ஈர்த்துள்ளது.

பவன் சாஹுவுக்கு யூடியூபில் சுமார் 2.77 கோடி பின்தொடர்பவர்களும், இன்ஸ்டாகிராமில் 70 லட்சம் பேரும், ஃபேஸ்புக்கில் 30 லட்சம் பேரும் இருப்பதாகக் கூறப்படுகிறது. தேர்தல் பிரச்சாரத்தின்போது ராஜஸ்தானைச் சேர்ந்த பல சமூக வலைதளப் பிரபலங்களும் வீடியோக்கள் வெளியிட்டு கோமல் சாஹுவுக்கு ஆதரவாக வாக்களிக்குமாறு கேட்டுக்கொண்டனர்.

மேலும், பவன் சாஹு தனது கிராமத்தில் கைப்பம்புகள், ஆழ்துளைக் கிணறுகள் அமைத்தது உள்ளிட்ட பணிகளைச் செய்ததாகவும், வீடுகள் கட்டுவதற்கு மக்களுக்கு உதவுமாறு வேண்டுகோள் விடுத்ததாகவும் தகவல்கள் தெரிவிக்கின்றன.

இருப்பினும், இணையத்தில் கிடைத்த பெரும் ஆதரவு தேர்தல் வாக்குகளாக மாறவில்லை. கோமல் சாஹு 277 வாக்குகளுடன் மூன்றாவது இடத்தைப் பிடித்த நிலையில், பகவதி லால் சோனி வெற்றி பெற்று சர்பஞ்சாகத் தேர்வாகியுள்ளார்.

இந்தத் தேர்தல் முடிவு, சமூக வலைதளங்களில் கிடைக்கும் புகழும் பின்தொடர்பவர்களின் எண்ணிக்கையும் உள்ளூர் தேர்தல்களில் கிடைக்கும் மக்களின் நேரடி ஆதரவுக்கு இணையானவை அல்ல என்பதை மீண்டும் விவாதத்திற்கு கொண்டு வந்துள்ளது.