வகுப்பறையில் தூங்கிய ஆசிரியர் – சுற்றித்திரிந்த மாணவர்கள்! வைரல் வீடியோவால் பணியிடைநீக்கம் செய்யப்பட்ட ஆசிரியர்!

Teacher asleep, students left unattended. In Bihar, Ajit Kumar’s classroom exposes a bigger failure: when teachers nap on duty, children pay the price and education suffers. https://t.co/bXa6WWEJFz

— NehaJha (@NeehaJha) October 30, 2026

பீகார் மாநிலம் சுபால் மாவட்டத்தில் உள்ள அரசு நடுநிலைப் பள்ளி ஒன்றில், வகுப்பறைக்குள் ஆசிரியர் தூங்கிக்கொண்டிருந்த வீடியோ சமூக வலைதளங்களில் பரவி பெரும் பரபரப்பை ஏற்படுத்தியுள்ளது.

ஹர்தி பூரப் கிராமப் பஞ்சாயத்தின் 3-வது வார்டில் அமைந்துள்ள ஜீவச்பூர் பாலக் அரசு நடுநிலைப் பள்ளியில் இந்தச் சம்பவம் நடைபெற்றுள்ளது. அங்கு பணியாற்றும் அஜித் குமார் என்ற ஆசிரியர், வகுப்பறையில் நாற்காலியில் கால்களைத் தூக்கி வைத்துக்கொண்டு தூங்கும் காட்சிகள் வீடியோவில் பதிவாகியுள்ளன. அதே நேரத்தில் மாணவர்கள் வகுப்பறைக்குள் எவ்விதக் கண்காணிப்பும் இன்றி அங்கும் இங்கும் சுற்றித் திரிவதும் அதில் தெரிகிறது.

இந்த வீடியோ வெளியானதைத் தொடர்ந்து, பள்ளியின் கற்பித்தல் நடைமுறை குறித்து பல்வேறு கேள்விகள் எழுந்துள்ளன. சம்பந்தப்பட்ட ஆசிரியர் அடிக்கடி பள்ளியில் இதேபோன்று நேரத்தைக் கழிப்பதாக உள்ளூர் கிராம மக்கள் குற்றம்சாட்டியுள்ளனர். இதற்கு முன்பும் பலமுறை எச்சரித்தும் அவரது செயல்பாட்டில் மாற்றம் ஏற்படவில்லை என்றும் அவர்கள் தெரிவித்துள்ளனர்.

அஜித் குமார் சிறப்பு ஆசிரியராகப் பணியாற்றி வருவதாகவும், அவர் மதுபானி மாவட்டத்தைச் சேர்ந்தவர் என்றும் தகவல்கள் தெரிவிக்கின்றன.

வீடியோ வைரலானதைத் தொடர்ந்து, மாவட்டக் கல்வி அலுவலர் சங்க்ராம் சிங் ஆசிரியரிடம் விளக்கம் கேட்டுள்ளார். மேலும், 24 மணி நேரத்திற்குள் பதிலளிக்க வேண்டும் என்றும் உத்தரவிட்டுள்ளார்.

இதற்கிடையே, வகுப்பறையில் தூங்கிய விவகாரத்தைத் தொடர்ந்து அஜித் குமார் பணியிடைநீக்கம் செய்யப்பட்டுள்ளார். பணியிடைநீக்கக் காலத்தில் அவர் மரௌனா வட்டாரக் கல்வி அலுவலர் அலுவலகத்தில் தலைமை இடத்தில் இருக்க வேண்டும் என்றும், அந்தக் காலத்திற்கு வாழ்வாதாரப் படி மட்டுமே வழங்கப்படும் என்றும் உத்தரவிடப்பட்டுள்ளது.

மேலும், வைரல் வீடியோவின் உண்மைத்தன்மையை உறுதிப்படுத்தி, சம்பவம் குறித்து முறையான விசாரணை நடத்த வேண்டும் என கிராம மக்கள் கல்வித்துறை அதிகாரிகளிடம் கோரிக்கை விடுத்துள்ளனர். மாணவர்களின் கல்வி பாதிக்கப்படாமல் இருக்க பள்ளியின் செயல்பாடுகளைத் தொடர்ந்து கண்காணிக்க வேண்டும் என்றும் வலியுறுத்தியுள்ளனர்.

இத்தகைய அலட்சியம் பொறுத்துக்கொள்ளப்படாது என்றும், விசாரணையின் அடிப்படையில் உரிய கடுமையான நடவடிக்கை எடுக்கப்படும் என்றும் மாவட்டக் கல்வி அலுவலர் தெரிவித்துள்ளார்.

வகுப்பறையில் ஆசிரியர் தூங்கியதாகப் பரவும் இந்த வீடியோ, அரசுப் பள்ளிகளில் மாணவர்களுக்கான கற்பித்தல் மற்றும் ஆசிரியர்களின் பொறுப்புணர்வு குறித்த விவாதத்தை மீண்டும் ஏற்படுத்தியுள்ளது.