இந்தியா–அமெரிக்கா வர்த்தக ஒப்பந்தம் இறுதிக்கட்டத்தில் – இந்த ஆண்டுக்குள் கையெழுத்தாகும் என ஜெய்சங்கர் நம்பிக்கை!

இந்தியா மற்றும் அமெரிக்கா இடையே நடைபெற்று வரும் வர்த்தக ஒப்பந்தம் தொடர்பான பேச்சுவார்த்தைகள் இறுதிக்கட்டத்தை எட்டியுள்ளதாக மத்திய வெளியுறவுத் துறை அமைச்சர் எஸ். ஜெய்சங்கர் தெரிவித்துள்ளார். இரு நாடுகளுக்கும் இடையேயான ஒப்பந்தம் இந்த ஆண்டுக்குள்ளேயே கையெழுத்தாகும் என்றும் அவர் நம்பிக்கை தெரிவித்துள்ளார்.

டெல்லியில் இன்று (அக்டோபர் 14) நடைபெற்ற சர்வதேச பொருளாதார மன்ற நிகழ்ச்சியில் கலந்துகொண்டு பேசிய ஜெய்சங்கர், இந்தியா–அமெரிக்கா வர்த்தக உறவுகள் மற்றும் ஒப்பந்தப் பேச்சுவார்த்தைகளின் தற்போதைய நிலை குறித்து கருத்து தெரிவித்தார்.

அமெரிக்கா போன்ற மிகப்பெரிய பொருளாதார சக்திகளுடன் வர்த்தகப் பேச்சுவார்த்தைகளை மேற்கொள்ளும்போது, மற்ற நாடுகள் பின்பற்றும் வர்த்தக நடைமுறைகளையும் ஒப்பிட்டுப் பார்த்து முடிவுகளை எடுப்பது அவசியம் என அவர் வலியுறுத்தினார்.

மேலும், சர்வதேச வர்த்தகச் சூழலைக் கருத்தில் கொண்டு பேச்சுவார்த்தைகளை முன்னெடுப்பதன் முக்கியத்துவத்தையும் அவர் சுட்டிக்காட்டினார்.

இரு நாடுகளுக்கும் இடையேயான வர்த்தக ஒப்பந்தப் பேச்சுவார்த்தைகள் இறுதிக்கட்டத்தை எட்டியுள்ளதாக அமைச்சர் தெரிவித்துள்ள நிலையில், ஒப்பந்தம் எப்போது அதிகாரப்பூர்வமாகக் கையெழுத்தாகும் என்பது எதிர்பார்ப்பை ஏற்படுத்தியுள்ளது.